Da ki bus bording ilektrik ba don AC pyllait paidbah u Conrad ban kamai ha nongbah Shillong

Shillong, Jylliew 9: Na ka bynta ka nongbah kaba ïakhun pyrshah ïa ka jingkhapngiah bad ka jingbun ki kali kaba nang kiew na kawei ka sngi sha kawei pat, ka jingpynmih ïa ki san tylli ki bos ilektrik ha ka sngi Ba-ar ka long shaphang ban don ïa ki kali thymmai ha ki surok.
Ka la long ka jingsdang jong ka jingpynkylla jong ka Shillong ha ka leit ka wan paidbah kaba khuid bad kaba lah ban shaniah.
U Myntri Rangbah ka Jylla u Conrad K. Sangma u la kaweh lama ïa ka kynhun ba nyngkong eh jong ki bos elektrik hapoh ka PM eBus Sewa Scheme, da kaba batai ïa kane ka jingthmu kum shi bynta jong ka plan kaba kham heh ban pynduna ïa ka jingkhapngiah, ban pynbha ïa ka jingïaid lynti bad ban pynshlur ïa ki nongshong shnong ban kiar na ki kali shimet sha ki kali paidbah.
Ki bos kiba don ka air condition, ki bym pynmih lyer jakhlia, ki lah ban iaid haduh 200 kilomitar tang shisien charge bad ki don ïa ki rukom shong bapher, ka rukom thied tiket digital bad ki rukom treikam kiba pyndonkam da ka GPS.
Katba tang san tylli ki bos la pyntreikam ha ka bynta ba nyngkong, ki heh sorkar ki la pynpaw ba ïa ka nongbah Shillong la shah mang baroh 50 tylli ki bos elektrik hapoh katei ka skhim.Lada pynïasoh bad ka jingbun ki bos diesel jong ka nongbah, ki bor synshar ki khmih lynti ba haduh 150 tylli ki bos kin treikam katkum ki por ba la buh hapoh ki hynriew bnai ban wan.
Katkum ka jingong jong ka Urban Affairs Department, ka jingbun ki nongleit nongwan man ka sngi ha ki bos ba dang shu sdang thymmai ha Shillong ka la kiew na ka 300 ngut eiei ha ka por ba sdang sha ka 3,000 ngut shisngi hapoh ki bnai.Da ka jingpynheh ïa ka network, ka sorkar ka khmih lynti ba ha kaba kut ki kali paidbah kin shakri haduh 60,000 ngut ki nongleit nongwan man ka sngi.
“Ka jingthmu kam dei tang ban pyniaid ïa ki bos.Ka jingthmu ka long ban thaw ïa ka rukom treikam kaba shngain, kaba lah ban shaniah, kaba lah ban tip lypa bad kaba lah ban ioh ïa ki nongshong shnong”, la ong u Myntri Rangbah ka jylla u Conrad K. Sangma.
Ki heh ophisar ki ngeit ba ka jingshaniah ha ki kali paidbah kan long kaba kongsan bha ban ïakhun ïa ki jingeh ba la slem bha ha ka leit ka wan jong ka nongbah Shillong.
Na ka bynta ki nongleit nongwan, ka jingwan jong ki bos elektrik ka pyni ïa ka lad leit jingleit kaba khuid.Na ka bynta ka nongbah, ka ai dak ïa ka jingkylla kaba kham khraw sha ka jingpynkylla kaba lah ban neh.