Shillong, Jylliew 9 : Ka Meghalaya kan sa ïohi ïa ka jingkiew kaba jur ha ka jingai kyrdan ka Performance Grading Index (PGI) jong u snem 2026-27, ong u Myntri ka Tnad Pule Puthi ha ka sngi Ba-ar, haba ainam ïa kane ka jingkiew ba la khmih lynti sha ki jingpynkylla kiba la leh ha kine ki phra snem ba la leit noh.
U Ma Lahkmen ula ïathuh ba ka jingpynleit jingmut jong ka Sorkar ka la long eh halor ka jingpynkhlaiñ ïa ka rukom pynïaid ïa ka pule puthi, ym tang ban ïabeh ïa ka jingaikyrdan ka PGI.
“Peit, nga sngew ba kane ka kam ka dei kaba biang eh ban ïakren, ym tang ban shu ïakren. Nalor kane, kaei kaba ngi hap ban khmih ka long la ka Sorkar ka la leh eiei ne em. Kane ka dei ka mat kaba kongsan. Mynta, hato ka Sorkar ka la leh eiei halor kane? Ka jubab ka long hooid, hooid, namar manla u snem, ka ju don beit ka jingnang kiew ha ka jingïoh kyrdan” ula ong.
U Myntri ula pynpaw ïa ka jingbha ka rukom ai jinghikai, ka bha ka miat ki khynnah pule bad ki nonghikai bad ka jingïoh leit skul kum ki kam kiba khraw kiba ka Sorkar kala leh.
“Nga thikna ba ha ka jingaikyrdan PGI 2026-27, ka kyrdan jong ngi kan kiew bha, namar kaei kaba ngi la leh ha kine ki phra snem ki dei ki bym pat ju leh mynno mynno ruh. Ym tang ban leh ei ei halor ka PGI, hynrei ban leh ei ei halor ka jingbha ha ka rukom ai jinghikai, leh ei ei halor ka bha ka miat ki khynnah pule, ki nonghikai bad kiwei kiwei” ula ong.
Ula wer ïa ka jingpyrshang ba ïai bteng na baroh kiba don ha ka tnad bad ong ba ka kam ba hakhmat eh ka dei ban ïai long ka jinghikai ïa ki khynnah pule.
“Kumta, ngi hap ban trei shitom, bad trei ym tang mynta ka sngi, hynrei ngi hap trei shitom man la ka sngi. Ngi ha ka Tnad Pule Puthi ngi la trei shitom bha, la ka long ki Ophisar, ki Nonghikai lane ki nongpynïaid kam, ngi hap ban trei shitom. Namar wat khmih ïa ka jingïoh kyrdan PGI, hynrei peit ïa ki skul bad kumno ban pynbha ïa ka rukom ai jinghikai namar ki kam ba hakhmat eh ka long ban ai ïa ka pule dangle kaba bha sha ki khynnah pule jong ngi” bynrap u Ma Rymbui.
