Khlem pat phah satia ka BJP ïa ka kyrteng ki kyrtong kiba kwah ban ïakhun na ka seng

Shillong, Jylliew 08: Ka state unit jong ka seng saiñ pyrthei ka Bharatiya Janata Party (BJP) haduh mynta kam pat shym la lah satia ban phah ïa kino kino ki kyrteng sha ka party high command ha New Delhi ki kyrteng jong ki kyrtong ki ban ïakhun na ka bynta ka elekshon shiteng samoi sha ka Lok Sabha na Shillong.
Katkum ka tyllong khubor ba la ïohlum la ïathuh ba ki la don kumba 9 ngut ki briew kiba la phah ïa ki application bad kiba la ïohpdiang ruh da ka party hynrei kam pat shym la don satia ka jingshim rai kaba khatduh halor kane. Na ka liang ka BJP Meghalaya ka la buh ka jingtyrwa ban phah shakhmat ïa ki 3 ngut ki kyrteng ki ban long kum ki kyrtong jong ka BJP ban phah sha ki nongïalam jong ka party ha Delhi.
Kumba long mynta ki la don kumba sawngut ki nongïakhun kiba khlaiñ kiba la dep ban pynpaw ïa ki kyrteng jong ki ban long ki kyrtong, watla ïa ka tarik kaba thikna ban pynlong ïa ka elekshon shiteng samoi ym pat pynbna satia da ka Election Commission.
Na ka liang ka Voice of the People Party (VPP) ka la jied ïa u Dr. Batskhem Myrboh ban pyndap ïa ka shuki jong u (late) Dr. Ricky AJ Syngkon, uba la khlad noh ha u bnai Rymphang.
Kum ka VPP, na ka liang ka National People’s Party (NPP) ka la jied ïa u DR Lyngdoh Nonglait. Ka seng United Democratic Party (UDP) ka la jied ïa u Bah VGK Kynta, u Muktiar. Tang ka Congress Party kaba la jied biang ïa u MP barim u Bah Vincent H Pala.
Lah ban pynkynmaw ba ka BJP ka khlem ïakhun ne pynïeng kyrtong satia ïa ka elekshon Lok Sabha na Shillong ha u snem 2024, hynrei ka la ai ka jingkyrshan ïa u kyrtong jong ka paralok jong ka, ka NPP.