Dang pynkhreh ki nongkhaïi bad trai par ïa ka kaiphod tih dewïong ba shngaiñ ban aiti sha u CM

Shillong, Jylliew 8 : U Nongïalam ka UDP bad u MLA ka Khliehriat u Ma Kyrmen Shylla u la ïathuh mynta ka Lah Sngi U Blei ba ka jingïaleh na ka bynta ka hok ban ïoh tih dewiong ka dei ban ïai bteng bad u kyrmen ruh ba ka jingtyrwa ba thymmai ba ki Nongkhaïi dewiong, ki trai jaka, trai par ki dang pynkhreh ban aiti sha u Myntri Rangbah khnang ba un ïoh phah sha ka sorkar pdeng ka long ka ban pdiang hun da ka sorkar pdeng. Kane ka jingtyrwa ka long ban ailad ban tih dewiong kumba long mynshwa tangba da ki rukom tih kiba shngaiñ ha baroh lai ki District kata ha East Jaintia Hills, West Khasi Hills bad Garo Hills.
U la ïathuh ba ka sorkar ka la bthah ïa kiba ïadon bynta lang baroh ha ka kam khaïi bad tih dewiong ba kin pynkhreh da ka jingthoh kaba don nongrim bad aiti ha u Myntri Rangbah khnang ba un ïoh ban phah ïa kane ka jingthoh sha ka sorkar pdeng.
“ Ngi ïakhun ban ïoh ïa ka hok jong ngi ngim don kano kano ka jingartatien bad ngi kyrmen skhem hi ruh ba ka sorkar kan bishar hok bad ai ïa kata ka hok ba ngi dei ban ïoh” ong u ma Kyrmen.
U la banjur ba kane ka jingthmu tih dewiong da kane ka juk saian ka ban tih lut ïa u lum kam lah ban long ha East Jaint Hills bad na kata ka daw la pynkhreh da ki jingtyrwa ba thymmai kumno ban tih dewiong kat kum kane ka juk kaba mynta kaba ym dei ban tih lut ïa u lum hynrei da ka buit thymmai kaba shngaiñ bha.
“ Ngi la ïohi ba kane ka rukom tih dewiong da kaba khlong ïa baroh u lum kam long kaba biang ha Jaintia Hills. Na kata ka daw ngi sngew ba ka por ka la dei ban leh da ka buit kaba thymmai. Ha kane ka jingtyrwa ban aiti sha ka sorkar la kdew ïa kiba bun rukom ki jingtih dewiong” ong u Ma Kyrmen.
U la ong ka jingbtep biang ïa ki krem kiba la dep tih bad ïehshrah khlem pyndonkam shuh kan ïarap ban lait na kino kino ki jingmynsaw.
U la ong “ Ngi kyrmen skhem ba lyngba kane ka dorkhast ka ban sa aiti sha u Myntri Rangbah lehse ïa kito ki krem kiba la ïeh shrah ruh lah ban pyndonkam biang, lada ngi lah ban wad ki lad jingïada bad ban bud pyrkhing ïa ka jingbthah ka sorkar khlem pep ngin pynïaid shakhmat ïa ka kam”.