Khynra ka ED ha 9 tylli ki jaka ha Mizoram na ka jingkhaïi be-aiñ ïa u kwai Myanmar ba 970 klur tyngka

Guwahati, Jylliew 8 : Ka Enforcement Directorate (ED) ka la pynlong ïa ka jingkhynra ha ki khyndai tylli ki jaka ha ka thaiñ Champhai jong ka Jylla Mizoram kum shi bynta ban tohkit halor ka jingkynnoh ba ka don ka jingkhaïi tuh ïa u kwai sha bar Ri kaba 970 klur tyngka bad ka kam thok pisa kaba don jingïadei bad ka Ri Myanmar.
Ia ki jingtalasi la pynlong katkum ka Prevention of Money Laundering Act (PMLA) bad la talasi ïa ki jaka sah bad ki jaka treikam jong ki katto katne ngut ki nongkhaïi bad ki trai jaka ha Champhai, ka jaka khappud kaba ïajan bad ka Ri Myanmar.
Kane ka jingtohkit ïa ka kam thok pisa ka mih na ka ejahar ba la register da ka Central Bureau of Investigation’s Anti-Corruption Branch ha Imphal hadien ka jingbthah na ka Gauhati High Court ha ka jingbishar ïa ka public interest litigation bad ka jingshalan tuh ïa u kwai na Myanmar sha India.
Ka ED ka ïathuh ba haka jingtohkit la lap ïa ka kynhun ki nong Burma bad la kynnoh ba ki pynïaid beaiñ ïa u kwai lyngba ka wah Tiau sha India lyngba ki jaka khappud ha Zokhawthar bad Champhai khlem da ïoh jingbit na ka Custom.
Ki kynnoh ba ki nongpynïaid na ka thaiñ ki la pdiang ïa ki mar na Burma bad ki la buh ïa ki kudam ha Champhai bad ki kit lyngba ka Vairengte hajan khappud Assam-Mizoram.
La kynnoh ba la bei tyngka da ki nongkhaïi bad ki nongbei pisa kiba don ha Silchar, Assam, kiba la phah ïa ka pisa lyngba ki bank sha ki account ba la pynïaid da ki briew ha Mizoram.
Ka ED ka la ong ba ka jingsiew sha ki nongpynpoi mar ha Myanmar la siew da ka pisa India bad hadien pat la pynkylla sha ka pisa Myanmar lyngba ki jaka pynkylla pisa kiba treikam hajan khappud.
Ka la kynnoh ba la pynmih ïa ki bill thok jong ka GST e-way kiba shongdor palat 337 klur tyngka ha Champhai hapdeng u snem 2021 bad 2024.
Katkum ka jingong jong ki nongtohkit, ki kot ki sla ki dei kiba la kyrshan da ki kot pynshisha thok bad ki kot pynlait khajna thok, watla ki trai kper kiba ïadei kam kim shym la shah pynrung kyrteng hapoh ka GST.
Ki jingwad bniah ki long shi bynta jong ka jingtohkit kaba kham jylliew halor kaei kaba ki bor ba dei khmih ki batai kum ka lynti khaïi tuh kaba stad bha kaba kynthup ïa ka jingwanrah mar be-aiñ, ka jingpynlong thok ïa ki kot ki sla, ki jingpynïaid pisa bad ka jingpynkylla ïa ki pisa ba la ïoh lyngba ka kam khaïi.Ka ED kam pat pynpaw bniah ïa ki jingkurup ba la leh ha ka por ba talasi.