Shwa ban kyntiew kyrdan ïa ka Ummulong CHC sha ka Hospital hiar jurip u Myntri mang 53 klur tyngka

Jowai, Jylliew 7 : U Myntri ka Koit ka Khiah ka Jylla u Ma Wailadmiki Shylla ha ka sngi Satjain, ula leit jurp ïa ka Ummulong Community Health Centre ha West Jaintia Hills District kum shibynta na ka jingpynkhreh ban kyntiew kyrdan ïa ka sha ka Integrated Hospital ha ka jinglut ba 53 klur tyngka, ka project ba ula pynbna dang shen.
ïa u Myntri la synran da u Medical Officer ba khmih ïa ka Ummulong CHC, ki nongïalam Shnong bad ki nongtrei ka Health Engineering Wing. U Myntri ula shim jingkheiñ ïa ka jingtei kaba doon mynta bad pynlong ïa ka jingïakren bad ki bor khmih halor ka jingpynkhreh ïa ka Detailed Project Report.
Haba kren sha ki nongthoh khubor hadien ka jingjurip, u Myntri ula ong ba kane ka jingwan ïuhkjat jong u ka dei kaba thmu ban bishar ïa ka jinglong jingman jong kane ka jaka bad ban pyndep ïa ka DPR khnang ba yn lah ban khot tender noh kham kloi kat kaba lah. “Nga kwah ba ka kam kan sdang noh kham kloi kat kaba lah na ka bynta ka jingmyntoi jong ki paidbah” ula ong.
Ka kynhun ka la ïakren ruh halor ka jingdonkam nongtrei na ka bynta ka hospital, kynthup ka jingbuh ïa ki doktor specialist, ki medical officer bad ki nongtrei Grade IV.
Halor ki tiar sumar, u Myntri ula ïathuh ba ïa ka jingthied tiar yn sa shong pyrkhat hadien ba la pyndep ïa ka jingtei kaba thymmai. Haba batai ïa ka jingjied ïa ka Ummulong CHC ban kyntiew kyrdan, u Bah Wailad ula ong ba kane ka jaka sumar ka shakri kum ka jaka sumar ba hapdeng eh jong kiba bun ki shnong kiba hap hapoh ka Laskein bad ka Nadong C&RD Block.
Ula pynpaw ba ki nongpang na kine ki thaiñ ki hap ban ïaid lyngba ka Ummulong CHC hashuwa ba kin poi sha ka Jowai Civil Hospital.
“Kumta, ka long kaba donkam ban pynkhlaiñ ïa kane ka jaka sumar. Ka Ummulong CHC kaba khlaiñ kan ïarap ruh ban pynduna ïa ka jingwan tuid ki nongpang ha Jowai Civil Hospital bad ka MCH Hospital” ula bynrap.