Sa sha rilum Garo poi ki jhur ba la ai shu airong, thoh ka ASPF sha u Conrad ban shimkhia mardor

Shillong, Jylliew 07: Ka Achik State Peoples’ Front (ASPF) ka la pynpaw ka jingsngewkhia halor ki jingïada ïa ki jhur ki jhep, ki soh ki pai, ki syiar bad ki jingri jingdup kiba wan rung sha Garo Hills na jylla Assam.
Ki jingujor bad ki kaiphod ki la mih ba la lap ïa ka jingpyndonkam da ki dawai ba thok kiba don jingma kiba la lap na ki jhur, ki jingri napoh Barpeta bad Guwahati bad halor kane ba la pynlong ïa ka ASPF, lyngba u general secretary Bernita Marak ban kyntu ïa u Myntri Rangbah ka jylla u Conrad Sangma ban shimkam noh mardor.
Ha kane ka taïew ba la dep ki la mih ki jingkynnoh ha Assam ba katto katne kiba die jhur ki la pyndonkam da ki dawai airong ba thok ban pynim ne pynthymmai biang ïa ki jhur kiba la sniew ne kiba la rim khnang ban lah ban die hapoh ki ïew ki hat.
Lah ban ong ba ka jingshah niah jong ka Garo Hills na ka jylla Assam na ka bynta ki mar kiba kongsan ka la pynlong ïa kane ka jinglong jingman kaba hap ban kyndit bynriew.
Ha ka shithi ba la phah sha u Myntri Rangbah u Conrad K Sangma, u Marak u la ong ba ka don ka jingma ïa ka koit ka khiah jong ki paidbah ha Garo Hills naba ki shaniah beit ïa ka jingpynpoi ki jhur, ki soh bad ki jingri kum ka doh na jylla Assam.
Halor kane ka ASPF ka la tyrwa bun ki sienjam ba thmu ban ai jingïada ïa ki mar bam. Kine ki kynthup ïa ka jingpyntreikam kaba pyrkhing ïa ki kyndon halor ka rung ka mih ki mar ki mata na Assam, ban buh ki jingjurip ba khah khah da ki ophisar food safety, bad ban buh ïa ka food laboratory center ha manla ki district.
U Marak u la banjur ïa ka jingdonkam kyrkieh jong ka jinglong jingman, da kaba kyrpad ïa ka sorkar jylla ban pyntreikam ïa ki sienjam kiba pyrkhing na ka bynta baroh ki tiar kiba wanrung sha Garo Hills hapoh ki entry point kiba hakhmat ha shilynter ka NH 217 Berubari (Bajengdoba), North Garo Hills, Dainadubi bad AMPT tat hadin ban da ïoh ïa ki syrnot ba la pynshisha ïa ki lad jingïada ba la ai da ka sorkar.
Shuh shuh ka ASPF ka la kyntu ïa ka sorkar ban buh ïa ki ophisar food safety bad ki ophisar na ka tnat veterinary ban bishar ïa kine ki kam kiba donkam kyrkieh.