Shillong, Jylliew 07: Ka Mawnianglah Youth SC bad ka Nongpiur SC ki la jop ïa la ki jong ki jingïalehkai jong ka lympung U-20 Fourth Division Football League 2026 ba la pynïaid da ka Shillong Sports Association, ha ka sngi Saitjaiñ.
Ha ka Group E, ka Mawnianglah Youth ka la pynjemkhnap haduh 6-0 ïa ka Summit Academy, ha kaba u Nicky Mawthoh (5′, 33′, 45’min) u la ïoh ban thep hat-trick. Kiwei pat ko kol la thep da u Andrew Maring (20’min), u Kenneth Jyrwa (23’min) bad u Eborlang Kharkongor (30’min).
Kham hashwa ha ka Group D, ka Nongpiur ka la pynliem da 3-0 ïa ka Mawshbuit SC. Kine ki lai kol la thep da u Melamjingshai (52’min) bad u Pynwanlang Nongneng (65′, 77′ min).
Katba kawei pat ka jingïakhun jong ka Group E, hapdeng ka Umiew SC bad ka Sei La Sap FCC, ka la kut ha ka jingïakhaid da mar 1-1 kol. U Kerryson Khyriem (14′ min) u la pynkhihjar nyngkong na ka bynta ka Sei La Sap hynrei u Iateiskhem Warjri (32’min) u la lah ban pynïakhaid na ka bynta ka Umiew.
Ki jingïalehkai ka lympung SSA U-20 Fourth Division Football League 2026 ha kane ka sngi Nyngkong, kin don ar tylli ha ka Group F, ka Gorkha Association pyrshah ïa ka Iaitylli SCC, ha ka por 1 baje mynsngi ha SSA Stadium, nangta ka Pommura SC pyrshah ïa ka Iateilang SC, por 4 baje nohphai sngi ha MFA Ground. Nangta kawei ha ka Group E, hapdeng ka Laitkroh SC pyrshah ïa ka Diengpasoh SC, ha ka por 4 baje nohphai sngi ha SSA Stadium.
