SHILLONG, Jylliew 07: Ka Seng Samla Malki, ha ryngkat ka jingsnohkti lang bad ka Malki Sports Club bad ka Seng Samla Kharmalki, ki la pynkupburom ïa u bah Thranghok Dkhar uba dei uwei na ki rangbah dong ha kane ka shnong uba la khur ïa ka takma rnong ha ka 4th PAFI Arm Wrestling Championship kaba la long ha Ahmedabad, Gujarat.
Ha kane ka miet, la ïadon lang ruh u bah Franky Kharumnuid uba dei u President ka Seng Samla Malki, bah Rominus Dkhar uba dei u General Secretary, bah Juban Kharmalki uba dei u Treasurer, ki nongkikam jong ka seng samla malki bad ruh jong ka Malki Sports Club bad ki nongmihkhmat na ka MAWA.
Na ka liang ki nongkren ki la pynpaw ïa ka jingsngew sarong ba u bah Thrang uba dei u rangbah dong ka dong Kharmalki, u la lah ban wan shakhmat ha ka jingïakhun kti kaba la long ka burom ïa ka shnong bad ïa ka dong.
Na ka liang u bah Thrang u la ïathuh ba tang 1 bnai u la pynkhreh ïalade ha kane ka rynsan, bad khlem duh jingkyrmen, u la lah ban pynliem ïa kiwei pat ki nongïakhun na kiwei ki jylla bad watla u la liem noh ha ki world champion, hynrei u don ka jingangnud ba sa shisien un ioh ban ïakhun biang ha ki rynsan baheh bad ban ioh pynliem ïa ki world champion na kane ka Ri.
