La plie paidbah ïa ka jingkieng kali bad ka surok ba pynïasoh ïa ka Shnong Shaitmoid bad Sohma

Mawkyrwat, Jylliew 05: U Bah Renikton Lyngdoh Tongkhar, MLA ka Mawkyrwat Constituency, ha ryngkat u Bah J.P. Marbaniang, Executive Engineer ka PWD (Roads) Mawkyrwat Division, ki ophisar jong ka tnat PWD (Roads) bad ki riew rangbah na ka thaiñ, ki la ïoh ban plie paidbah noh ïa ka jingkieng kali bad ka surok kaba pynïasoh ïa ka shnong Shaitmoid bad ka shnong Sohma, South West Khasi Hills District, kaba la tei lyngba ka skhim RIDF – XXVI.
Kane ka projek ka kynthup ïa ka surok kaba jngai kumba 1.40 kilometres bad ka jingkieng kali kaba long ka jingïarap kaba khraw ïa ki paidbah jong katei ka thaiñ. Ka jingpyndep ïa kane ka projek ka la pynsuk shibun ïa ka leit ka wan, ka kit ka bah bad kiwei pat ki jingdonkam jong ki nongshong shnong kiba ju mad jingeh mynshwa.
Ha ka jingïakren jong ki nongïalam shnong, ki la pynpaw ba kane ka jingkieng bad ka surok kin long ka jingkyrkhu ïa ki paidbah namar ba kin pynsuk ïa ka jingïadei hapdeng ki ar shnong, ka ïoh ka kot bad ki kam pynroi bapher bapher ha ka thaiñ.
Ha kajuh ka por, la pynlong ruh ïa ka prokram thung dieng ha katei ka jaka kum shibynta ban rakhe ïa ka World Environment Day lane ka Sngi Kyrpang ban Burom ïa ka Mei Mariang. Ki nongshim bynta ki la thung ïa ki tynrai dieng kum ka dak jong ka jingkitkhlieh ban sumar bad pynneh pynsah ïa ka mariang.
Ym tangkata, la ong ba kine ki jaka ka dei ki jaka kiba itynnad bha ha South West Khasi Hills District, kaba la kyrkhu da ki lum ki wah bad ka mariang kaba paka. Da ka jingitynnad jong ka sawdong sawkun, la khmih lynti ba kan khring ïa shibun ki nongwan jngohkai pyrthei bad ki riew ieid mariang ha ki sngi ban wan, kaba lah ruh ban kyntiew ïa ka kam jngohkai pyrthei ha ka thaiñ.