Ai jingmut u Scindia 5 tylli ki mat treikam ïa ka NESAC ban pyntyllun ïa ka roi ka par ha NE

Shillong, Jylliew 6: U Myntri Sorkar Pdeng u Jyotiraditya M Scindia ha ka Sngi Palei ula wanrah 5 tylli ki buit treikam ba kongsan ban pynkylla ïa ka NESAC kum ka “Jaka wanrah jingkylla” na ka bynta ka thaiñ Shathei Lam Mihngi (North East) ka ban pynleit jingmut ha ka Space Tech, ka jinglah ban ïaleh pyrshah ïa ki jingpynjulor ki bor mariang bad ka jingbuh jingkheiñ ïa ki khlaw ki btap.
Haba pynïaid ïa ka jingïalang jong ka NESAC Society ha Shillong, u Scindia u la ong ba ka thong ka kynthup ïa “ka jingkynthup hapoh ka map ïa ki shnong, ki jaka lang um, ki khlaw ki btap bad ki jaka puta, ka jingsdang ïa ka Space-Technology Startup ha ka thainñ shatei lam mihngi, ka jingsdang ïaka All-Hazard Disaster Resilience Digital Twin Platform, bad ka Northeast Green Wealth and Natural Capital Accounting framework”.
U la kdew ba ka NESAC bad ka DoNER ki la ïatreilang la palat 26 snem mynta. “Ka NESAC bad ka DoNER ki la ïasam ïa ka jingïadei kaba jan naduh ba la seng ïa ki. La sdang ïa kane ka jingïadei katkum ka jingïohi jngai bad hapoh ka jingïalam jong u Myntri Rangbah duh barim u Atal Bihari Vajpayee, baroh ar tylli ki tnat treikam ki la shakri ïa ki 8 tylli ki Jylla ka thaiñ Shatei Lammihngi khlem sangeh la palat 26 snem kum ki atiar jong ka roi ka par bad ka jingkylla,” ong u Scindia.
Naduh ka jingïalang ba khatduh jong ka NESAC, la dep haduh 50 tylli ki projek bad 78 tylli ki dang ïaid ka jingpyntreikam. “Ka jingpyndep ïa ki 50 tylli ki projek ka pyni ïa ka jingsdang ban lum jingtip da ki kor computer (Digital) kaba kyrshan ïa ki jingangnud jong ka jingpynroi jong palat ki 4.5 klur ngut ki briew ha ka thaiñ,” u la ong.
Halor ka jinglah ban ïakhun pyrshah ïa ki jingjia shah pynjulor, u Scindia u la jer ïa “ki rukom pyntip ba bun jait, kum ki sienjam ban pynïasoh bad ki Network Telecom bad ban pynïar ïa ki tiar ban peit bniah ïa ki jingma na ka bynta ka jingtwa khyndew.
U la ban jur ïa ka jingpyndonkam ïa ki UAV na ka bynta ki kam, “Ki buit stad jong ki drone bad ka jingpyndonkam ïa ki UAV jong ka NESAC ban thaw ïa ki lad kamai bad ki lad pynroi ïa ki sap na ka bynta ki samla bad ki kynthei lyngba ka jingïatreilang bad ka jingthmu jong ka Namo Drone Didi.”
Haba ai khublei ïa ka bynta jong ka ISRO, u la ong: “Ka jingïashim bynta jong ka ISRO ka la ai bor thymmai ïa ki jingpyrshang jong ka NESAC.
Ki Missions kum ka Chandrayaan-3 bad Aditya-L1 ki pyni ïa ka jinglah ka India ban sei ïa ka bor Science kaba lam sha ki jingjop bapher bapher ha ka kyrdan jong ka pyrthei.
“Kumba la thmu da u Myntri ka tnat kam Pohïing u Amit Shah, ngi dei ban shim ïa ka buit treikam kaba la pynkhreh na ka bynta ka lawei kaba pyndonkam ïa ka teknoloji ha ka suiñbneng (Space Technology), ha ka Geospatial Intelligence bad ka jingpynwandur thymmai ban pynkylla ïa ka jingsynshar, ban pynkhlaiñ ïa ka jinglah ban ïakhun bad ban pynbha ïa ka jinglong jingman ha kylleng ka thaiñ Shatei Lammihngi,” ong u Scindia.
Ha kane ka jingïalang la don lang u Myntri Rangbah ka Jylla Meghalaya u Conrad K Sangma, u MoS DoNER u Sukanta Majumdar, u Chairman ka ISRO u Dr. V Narayanan.