Shillong, Jylliew 06: Ka Martin Luther Christian University ka la rakhe ïa ka World Environment Day 2026 lyngba ka jingpynlong ïa ka jingpynkhuid bad ka jingpynsngewthuh paidbah haba ïadei bad ka jingpyndonkam ban pynneh ïa ka sawdong sawkun ba la pynlong da ka NSS Unit bad ka Student Wellbeing Office kaba la pynlong ha Umsawli Campus.
Kane ka prokram ka thmu ban kyntiew ïa ka jingpynsngewthuh paidbah haba ïadei bad ka jingïada ïa ka sawdong sawkun, ka jingpynneh bad ka jingshim jingkitkhlieh lang ban ïada ïa ka sawdong sawkun.
Ha kane ka sngi la ïashim bynta lang da ki samla pule, ki nongtrei bad ki nonghikai ha kane ka jingsdang, kaba long kum ka jingnoh synniang ban pynneh ïa ka jingkhuid bad ka jingjyrngam jong ka sawdong sawkun.
Ki samla pule, ki nonghikai bad ki nongtrei ki la shim bynta shitrhem ban pynkhuid ïa ki jaka bad kumjuh ki la pynlong ïa ka prokram pynsngewthuh halor ka mariang bad ki la pynkhuid ruh ïa ka sawdong jong kane ka jaka pule. Ïa kane ka jingpynkhuid la pynlong ha shilynter jong ka Umsawli Campus bad ha ki jaka ba marjan. Ka prokram ka batai ruh halor ka jinglong kongsan ban tynkai ïa ka sawdong sawkun, ka jingpynlang ïa ki jaboh jabaiñ, ka jingdonkam ka jingkhuid ba kiwei ki jingleh ki ban ïarap sumar ïa ka mei mariang.
Na ka liang ki bor pyniaid jong ka University ki la pynpaw ka jingai khublei ïa ka jingïashim bynta jong ki samla pule, ki nonghikai bad ki nongtrei ban pynlong ïa kane ka prokram kaba jop.
