Wad ïa ki lad ki lynti kiba kham tyngeh ïa ka jingwan buhai shnong beaiñ, pynsngew ka sorkar ha u Amit Shah

Shillong, Jylliew 4: U Myntri Rangbah ka Jylla Meghalaya u Conrad K. Sangma u la kyntu ïa u Myntri kam pohïing ka sorkar pdeng u Amit Shah ban pynkhlaiñ ïa ki lad ki lynti ban khynra ïa ki briew kiba wan rung be-aiñ sha kane ka jylla, da kaba pynim biang ïa ka jingdawa kaba la slem bha ban pyntreikam noh ïa ka Inner Line Permit (ILP).
Ha ka jingiakynduh bad u myntri kam poh ïing ha Shillong mynta ka sngi, u Sangma u la aiti ïa ka dorkhas kaba la kdew ïa ki katto katne ki jingeh ba kongsan jong ka jylla, kynthup ïa ka jingwan buhai shnong be-ain, ka jingithuh ïa ka riti synshar ka ri ïa ka ktien Khasi bad Garo, ka jingtyrwa ban pynkylla ia ka Sixth Schedule, bad ka jingpynkylla ia ka Foreign Contribution (Regulation) Act (FCRA).
Halor ka jingwan rung tuh beain, u myntri rangbah ka jylla u la ong ba ka jylla Meghalaya ka donkam ïa ka rukom treikam kaba kham biang ban pynbeit ïa ka jingwan rung ki briew kiba nabar bad ban khanglad ïa ka jingwan rung be-ain.U la pynpaw ïa ka aiñ Meghalaya Residents Safety and Security Act (MRSSA) bad ka rukom treikam jong ka ILP-baroh ar la kyrshan da ki rai ba la mynjur da ka Ïingdorbar Jylla-kum ki atiar kiba lah ban pynkhlain ïa ka jingpeitngor bad jingpynbeit.
Ka dorkhas ka la kyrpat ruh ban pynrung ïa ka Khasi bad Garo ha ka Khyrnit kaba phra jong ka Riti Synshar, ka jingdawa kaba la slem bha kaba thmu ban ïoh ïa ka jingithuh ba thikna bad ban kyntiew ïa ka jingpynneh pynsah ïa ki ktien tynrai jong ka jylla.
Shuh shuh u Sangma u la kyrpad ïa ka Centre ban pynlong ïa ki jingïamir jingmut bad ki jylla jong ka thaiñ Shatei Lammihngi shwa ban ïaid shakhmat bad kino kino ki jingpynkylla ïa ka Sixth Schedule, da kaba ban jur ba dei ban pynkhlain ïa ki jingïada ïa ki jaitbynriew bad ki rukom synshar hi dalade ym ban pynsniew.
U myntri rangbah u la pynsngew ruh ïa ki jingeh ba la pynpaw da ki seng bapher bapher ha kaba ïadei bad ki jingpynkylla ïa ka FCRA, khamtam eh ïa ki kyndon kiba lah ban ktah ïa ka jingtreikam bad ki mar ki mata jong ki.
Hadien ka jingialang, u Sangma u la ong ba u ai khublei ïa u myntri kam poh ïing na ka bynta ka jingsngap kaba sbun bad pynpaw ïa ka jingkyrmen ba kin mih ki jingkyrmen kiba bha halor ki mat ba la pynpaw.
Kane ka dorkhas ka wan hapdeng ka jingdawa jong ka saiñ pyrthei bad ki sengbhalang ha Meghalaya na ka bynta ki jingïada kiba kham khlaiñ pyrshah ïa ka jingwan buhai shnong be-aiñ bad ka jingïada kaba kham khraw jong ka riti synshar na ka bynta ka jingithuh ïa ki jaitbynriew ka jylla bad ki tnat treikam jong ka jylla.