Ba wan u Amit Shah sha Shillong, yn pynkynmaw biang ïa ka ILP bad ïoh jingithuh Ktien Khasi bad Garo

Shillong, Jylliew 03 : Ka Meghalaya kan buddien biang ïa ki jingdawa kiba la sahteng slem jong ka jylla kynthup naduh ka Inner Line Permit (ILP) bad ka jingdawa ban ïoh jingithuh noh ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.
Haba pynpaw ba ïa kine ki ishu kiba la slem bha ba ka jylla ka ïa khun, u Symbud Myntri Rangbah ka Jylla, Bah Prestone Tynsong u la ong ba kin pyrshang ïa kynduh markhmat bad u Myntri Kampohiing ka Ri u Amit Shah uba don mynta ha Shillong ban shim bynta ha ka NEC Plenary meeting bad ki Myntri Rangbah bad kumjuh bad ki Lat jong ki Jylla na ka thain shatei lam-mihngi jong ka Ri.
“Ka jingïalang ka dei halor ka North Eastern Council (NEC), hynrei na ka jylla pat ngin ïa i bteng ban buddien,” u la ong haba kdew ïa ka jingïalang bah kaba 73 jong ka NEC kaba long ha Shillong naduh ka 03 tarik haduh ka 05 tarik Jylliew.
Shwa kane, u Symbud Myntri Rangbah u la ong ba kine ki ishu kiba kongsan jong ka jylla ki la dep ruh ban ïoh ïa ka jingmynjur lang da baroh lyngba ka Iing Dorbar Thawain ka Jylla bad mynta ka don ha kti jong ka Sorkar Pdeng ban ai ïa ka jingmynjur.