Mar ïadep pynheh ïa ka kynhun myntri ha Assam yn sdang biang ka jingkren pynbeit pud : Bah Prestone

Shillong, Jylliew 03 : Ka jingïakren pynbeit pud ha ka kylla kaba ar hapdeng ka jylla Assam bad Meghalaya ha ki hynriew tylli ki jaka jingïakajia pud kiba dang sah kan sdang biang tang hadien ba ka sorkar Assam ka la dep ban pynheh ïa ka Kynhun Myntri, ong u Symbud Myntri Rangbah ka Jylla, u Prestone Tynsong ha ka sngi Balang.
Haba jubab ïa ki jingkylli halor ka jingïaid shaphrang jong ki Regional Committee pynbeit pud, u Bah Prestone ula ïa thuh ba kine ar tylli ki jylla ki dang ap ïa ka jingpynbeit thymmai ïa ka Kynhun Myntri ha Assam shuwa ba kin lah ban bteng ïa ka jingpynbeit pud.
“Ha kaba ïadei bad ki Regional Committee kiba peit ïa ki jaka ïakajia hapdeng ka Meghalaya bad Assam, ngi dang hap ban ap namar ba ka jylla Assam ka dang ap ïa ka jingpynheh ïa ka Kynhun Myntri,” u la ong haba kren bad ki lad pathai khubor.
Ha kajuh ka por u la ïa thuh ba na ka liang u Myntri Rangbah ka Jylla u Conrad K Sangma u dang ïa i bteng ban ïa kren na ka por sha ka por bad u Myntri Rangbah ka Assam u Himanta Biswa Sarma.
“Na ka liang u Myntri Rangbah ka Assam u la pynpaw lypa ïa ka jingkwah jong u ban bteng ïa ka jingïakren bad ïa ka jingïakhmih lang da ki Regional Committee jong kine ar jylla. Hynrei u la kyrpad ïa ngi ban ap haduh ba la pyndep ïa ka jingpynheh ïa ka Kynhun Myntri,” u la ong.
U la batai ruh ba kane ka jingpynslem ka long ban pynthikna ba ki Myntri kiba dei peit ïa kane ka kam kin lah ban don bynta lang.
“Kane ka long khnang ba ki Myntri kiba yn bynshet ïa kane ka kam kin lah ruh ban don bynta lang ha ka Regional Committee,” u la bynrap.