Saphriang ka jingpang khlam ASF ki sniang ha 4 tylli ki District pynjari ka sorkar ïa ki kyndon ban tehlakam

Shillong, June 2 : Ka Tnad Animal Husbandry and Veterinary ka la pynbna paidbah ba ka la don ka jingsaphriang jong ka jingpang khlam sniang bala tip kum ka African Swine Fever (ASF) ha ki katto katne tylli ki shnong ha ki saw tylli ki District ka Jylla.
Kine ki district ki dei ka East Khasi Hills, West Khasi Hills, Ri-Bhoi bad ka Eastern West Khasi Hills bad ka Tnad ka la pyntreikam ruh ïa ka Section 6 bad 20 jongka Prevention and Control of Infectious and Contagious Diseases in Animals Act, 2009, da ka jingthmu ban ïada, tehlakam bad pynduhjait ïa katei ka jingpang.
Lah pynthikna ïa ki jingjia kiba la lap ha ka shnong kiba hap hapoh jongka Pynursla, Mawlai, Mawthadraishan, Umsning, Bhoirymbong bad Mairang Block. Kine ki jaka kiba la shah ktah ki kynthup ruh ia ka Base Pig Breeding Farm, Nongkasen bad ka Regional Pig Breeding Farm, Kyrdemkulai.
Hapoh jong ka National Action Plan, baroh ki shnong kiba hapoh u pud jong ka 1 Km na ki jaka kiba shah ktah la pynbna ïa ki kum ka “Infected Zones” ne ‘ki jaka kiba shah ktah’, katba ki jaka kiba hap hapoh u pud u sam jong ka 10 Km la dep ban ithuh ïa ki kum ki “Surveillance Zones” ne ki jaka kiba don hapdeng ka jingpeitngor.
Ka sorkar ka la khang pyrshah ban kit ïa ki sniang kiba im, jingbam sniang, ka dohsniang bad ki jingbam kiba pynmih na ka doh sniang shapoh ne shabar na ki jaka kiba shah ktah. La hukum ruh ba ki ïew die sniang bad ki jaka ot doh ha kitei ki jaka ki dei ban khang khyrdep noh tad haduh ban da pynbna da kumwei pat.
La khang pyrshah ban ai bam da ki jingbam kiba tam ne kiba la kyntait, ïa ki mrad kiba la iap dei ban tep hapoh ki jaka kiba la shah ktah bad dei ban tih da ka thliew kaba jylliew bad ban bret da ka shun. Ka jingbret ha ki wahduid, ki wah ne pung ka dei kaba la khang pyrshah.
“Kino kino ki riewshimet lada lap ba ki leit bret ïa ki mrad kiba la iap ha ki wah, pung, nala ne ki tyllong um kin shah pynshitom katkum ki kyndon jong katei ka aiñ” la pynpaw ha ka jingpynbna paidbah.
“Kiba pynkheiñ ha ka sien kaba nyngkong kin shah daiñ kuna 2,000 tyngka ne shah set phatok shi bnai lada ym siew ïa ka jingshah daiñ kuna, katba kito kiba ïai bteng ban pynkheiñ ïa ka hukum kin mad ïa ka jingshah daiñ kuna kaba 5,000 tyngka ne shah set phatok palat ïa ka 3 bnai ne shah pynsajia lang baroh ar.
Ha ka Surveillance Zones ne jaka ba jur ka jingpeitngor, ka jingpynkit ïa ki sniang im sha ki jaka kiba shah ktah ka dei kaba la khang tyngeh . Ka dohsniang ne ki jingbam kiba pynmih na ka dohsniang yn ym lah ban pynïaid ne pynkit sha ki jaka ki bym don jingktah katei ka jingpang.
“Yn ym shah ban don kano kano ka jinglum lang ïa ki jingri ka ban kynthup lang ïa ki sniang”. Ki kali ki dei ban pynkhuid bad ban synreit da ki kynja dawai shwa ban mih.
Ka Tnad kala bthah ïa u Divisional Forest Officer, Wildlife Division, ban shim ïa ki sienjam kiba kongsan ban khmih bniah bad ban pynïaid ïa ka jingdon jongki sniang khlaw ha ki khlaw ki btap kiba don ha sawdong sawkun jong ki jaka kiba shah ktah bad ki jaka kiba don hapdeng ka jingshah peitngor.
“Na ka bynta ki Free Zones, ne ki bym don jingshah ktah ki nongrep ki dei ban buh bha ïa ki mrad bad ban tehlakam ba kim dei ban don ka jingïajan bad ki sniang khlaw, ki sniang bad ki mrad kiba ïaid ruma”.
Ka jingpynkit a ki sniang, ki mar kiba pynmih na ki sniang, ki jingbam sniang na ki jaka kiba shah ktah bad kiba shah peitngor ka dei kaba la mana tyngeh.
Ka Tnad kala kyntu “ïa ki nongri sniang, ki nongkhaïi, ki Dorbar Shnong, ki Rangbah Shnong bad ki nongïalam shnong ba kin ai ka jingïatreilang kaba pura bad ki ophisar jong ka Veterinary bad ka Rapid Response Team ha kaban pyntreikam ïa ka jingtehlakam bad ban shim ïa ki lad ki lynti ban tehlakam ïa kane ka jingpang”.