Shillong, Jylliew 2 : U Nongïalam ka NPP bad Myntri Sorkar u Ma Wailadmiki Shylla ha ka sngi Ba-ar, ula ong ba kam shym don satia kano kano ka jingïashrut hapoh ïing halor ka jinglong kyrtong sha ka shuki MP Rajya Sabha, haba bynrap ba ka rai ba khatduh ka shong eh ha ki Nongïalam ba halor. Kum ka ïing ba ïatylli yn pdiang bad mynjur ïa ka rai jong ki nongïalam.
“Phi ïohi, khlem pep nga don la ka jong ka jingsngew, kiwei ruh kin don la ki jong ki briew kaba ki kwah ban rah, kumta, kane kam mut ba ka don ka jingïashrut, ka dei ka hok jong baroh ban rah ïa la ki jong ki briew kaba ki sngew ba ki biang” ong u Bah Wailad haba ïakren bad ki nongthoh khubor.
Ula ban jur ïa ka jingïatylli ka party hapdeng ki jingïakren halor ka jingmih bun ki kyrteng.
“Kum ka party, kumba ong u Myntri Rangbah, ki Symbud Myntri Rangbah bad kiwei, ka NPP ka dei ka longïing kaba heh bad ba kmen, kumta kano kano kaba rai da ki nongïalam jong ngi, ngi burom ïa ki rai jong ki” ula ong.
Haba kylli, ula ong “Ki don saw tylli ki kyrteng kiba mih, ha ki lad pathai khubor ruh ki la mih, hynrei kumba nga ong, haba kut ka dei ka rai jong ki Nongïalam kiba halor”.
