Mawkyrwat, Jylliew 02 : U MLA, MDC ka Ranikor Constituency, u Bah Pius Marweiñ, u la plie paidbah ïa ka Swimming Pool kaba la tip kum ka Kynshi–Rilang Swimming Club, kaba don ha Ranikor ha kaba ïa kane ka projek la pyntrei lyngba ka MDC Scheme 2020–2021 ha ka jingmang pisa kaba long T. 7 lak.
Haba kren ha kane ka jingïalang, u MLA/MDC ka Ranikor Constituency, u Bah Pius Marweiñ u la pynpaw ba ka jingdon jong kane ka Swimming Pool kan long ka jingïarap bad ka jingkyrkhu kaba khraw ïa ki khun samla jong ka dong ka thaiñ, khamtam eh ïa kito kiba don sap ha ka jingïalehkai jngi-um (swimming). “Kane ka jaka kan ai lad ïa ki samla ban pyntbit shuh shuh ïa la ki sap bad jingïoh jinghikai ha ka kam jngi-um”, ong u bah Pius.
U la ong ruh ba ha ki snem kiba la leit noh, bun ngut ki samla na ka dong ka thaiñ ki la lah ban mihkhmat ïa ka District bad ka Jylla ha ki jingïakob jngi-um bapher bapher, bad ki la wanrah ruh ïa ka nam bad ka burom ïa la ka shnong, ka district bad ka jylla.
Kumta, ka jingïoh ïa kane ka Swimming Pool kan long ka lad kaba biang ban pynroi ïa ki sap jong ki samla bad ban pynkhreh ïa ki bynta ban shim bynta ha ki jingïakob kiba kham heh ha ki por ban wan.
Ki paidbah ka thaiñ ki la pynpaw ïa ka jingsngewnguh ïa u MLA/MDC bad ïa baroh kiba la noh synñiang ban pynurlong ïa kane ka projek kaba don bynta ban kyntiew ïa ka jingim jong ki samla bad ban pynroi ïa ka kam jingïalehkai ha ka thaiñ Ranikor.
