Nongpoh, Jylliew 01: Ka jingjur ka die bad khaii ïaka kyiad beaiñ kala shyrkhei ha bun ki jaka ka sor Nongpoh namar ym don ba shimkhia wat ka tnad Excise kaba dei peit ka leh matlah, ha kaba ki nongdie kim salia shuh ban die pylleiñ pylleiñ wat haka sngi u Blei kaba la ilehraiñ ban peit ruh bad thad ïaka burom jong ka shnong, haka sngi ba bun naki paidbah ki ïaid lynti ban leit sha ki iingmane.
Hadien ka jingioh jingtip ba ki don ki briew ki bym salia ban wan die kyiad ha Nongpoh haka sngi u Blei, naka liang ka Dong Upgate jong ka shnong Nongpoh naduh u Rangbah Dong, ki longkmie bad ki samla kila leit ban pynlong ka jingkhynra hadien ba la dep ban mana ïaki bunsien namar ka jingikhlemraiñ bad ym shngaiñ shuh ka leit ka wan khamtam ki kynthei khynnah khamtam kiba leit jingïaseng.
Ha katei ka jingkhynra da ki nongïalam shnong, la synrang lang ruh da ki pulit ka Nongpoh Police Station bad ioh ban kurup kumba 246 plastik ka kyiad pyrsi bad naka liang ki nongïalam shnong kila theh bad pynpait lut ïa katei ka kyiad ha nala surok.
Naka liang u Bah Albinus Lamo Rangbah Dong ka Upgate, Nongpoh u la ong ba kum ka shnong kala ïaleh man ka por ban wanrah ïaka khuid ka suba bad khamtam ka jingitynnad jong ka shnong hynrei ka jingdon jong kine ki nongdie kyiad beaiñ kala pynjaboh khaid, khamtam haka por mynmiet.
U la ong ruh ba kum ki bor shnong kila buh ruh ka jingmaham kaba tyngeh ba kane kan dei ka sien ba khatduh bad lada dang lap nangne shakhmat naka liang ka shnong kan da shim da ka sienjam kaba tyngeh ryngkat ka kuna kaba heh.
