Pyllait u Lat ïa ka kot ba thoh bniah halor ka jingdon 698 jait ki Thapbalieh ha Meghalaya

Shillong, Jylliew 1 : U Lat ka jylla Meghalaya u CH Vijayashankar ha ka Lah Sngi U Blei u la pyllait paidbah ïa ka kot ba la jer kyrteng “ Butterflies of Meghalaya” kaba dei ka kot ba la wad bniah, tih bniah bad thoh bniah halor ka jingriewspah ka jylla ha ka jingdon ki Thapbalieh namar ka don haduh 698 jait ki Thapbalieh. ïa kane ka kot la pyllait paidbah ha Lok Bhavan.
U Additional Chief Secretary ba dei khmih ïa ka ophis u Lat u HC Chaudhary u la ïadon ryngkat lang ha kane ka jingpyllait ïa kane ka kot.
ïa kane ka kot la pynbit pynbiang da u Chaudhary u IFS Ophisar ha ka por ba u dang trei ha ka tnad kam khlaw ryngkat ka jingïatreilang bad ki ophisar kiba don sha madan.
La thoh pat ïa kane ka kot da u Dr Krushnamegh Kunte uba dei u Saiantis bad nongwad bniah bad u Sanjay Sondhi u Nongseng ïa ka Titli Turst.ïa ka jingpynmih ïa kane ka kot la kyrshan da ka Eicher Group Foundation bad ka CSR na ka Royal Enfield.
U Nongthoh ula ïathuh ba ka Meghalaya ka don palat shiteng ki jait thapbalieh kiba don ha ka ri India baroh kawei.
Kane ka pyni ba kane ka jylla ka dei kawei na ki jylla kaba riewspah bha ha ki syntiew ki skud bad ki khlaw ki btap ha ka ri hi baroh kawei.
Ki la ïathuh ba ka ri lum Garo ka wan ba lai na ki jaka ba bun jait ki thapbalieh ha kane ka thaiñ shatei lam mihngi.
Haba kren ha ka jingïalang u Lat ula ïaroh ïa kane ka jingriewspah ka jylla ha ki thapbalieh bad ki syntiew ki skud bad u ong ka long kaba dei ban niewkor bha bad kyntu ruh ïa ki paid nongshong shnong ban ri ban sumar ïa ki sawdong sawkun jong ka mariang.
“ Ki thapbalieh ki pynpaw ïa ka jingkhuid jingsuba ka mariang bad ka jingdon ïa ka mariang kaba kyrpang. Ka donkam ban hikai ïa ki nongshong shnong, ïa ki jaka pule bad wat ïa ki dorbar shnong ruh ïa ka jingdonkam jongki thapbalieh bad ka mariang”. ong u Lat.