Shillong, Jylliew 01 : Ki nongïalam shnong jong ka Laitkynsew ha ka sngi Nyngkong ki la ong ba lada dei ba ki kynhun ki pyntip bad khot lang ïa ki bor shnong ban donlang ha ka jingkhynra nongbylla bar jylla ha Rikynjai-2 dang shen lehse kan ym mih satia kano kano ka jingjia bym sngewtynnad.
“Lada dei ba ki khot lang ïa ka shnong kan ym mih kum kito ki jingjia ba sngewsih,” ong u Sordar Shnong Bah M Basaïawmoit. U la ïathuh ba ha u snem 2024 ka la don teng kum kane ka jingkhynra nongbylla bar jylla hynrei ha kitei ki snem ki la pyntip bad khot lang ïa ki nongïalam shnong.
U Sordar u la ong ba kum u Nongïalam Shnong u sngewkhia haduh katta katta ban ïohi ba kum kine kiei kiei kin jia hapoh ka shnong.
“Kum u Nongïalam Shnong nga sngewkhia ka mynsiem ban ïohi ba kum kine kin jia.” Ha kajuh ka por u la ïathuh ba na ka shnong ki ju buh rekod haba ïadei bad ki nongbylla na shabar kiba wan bylla ha katei ka thain.
“Nga sngewsih shibun ban ïohi ïa kum kine ki jingjia namar kine ki dei ki jaka ba ai khaw hynrei da kaba leh kumne ka pynthut noh ïa ka jingai kam ai jam ïa ki samla. Haba la pynsangeh noh ïa ka kam shaei kin leit bylla pat,” u la ong.
Shuh shuh u la pynpaw ba kum u Nongpeit jong ka Shnong u kwah ban ïohi ba kum kine ki jingjia kim dei shuh ban jia bad ba lada don kino kino kiba kwah ban wan khynra ïa ki nongbylla bym dei trai muluk ki dei ban khot lang ïa ki bor shnong khnang ba kin ym mih kino kino ki jingjia bym sngewtynnad.
“Lada wan lang bad ki bor shnong kan ym don satia ka jingjia ba sngewsih. Peit ha u snem 2024 ka kam ka ïaid beit namar ki wan da ka lynti kaba dei,” bynrap biang u Sordar.
Uwei na ki rangbah ba treilang ha katei ka projek u la ïathuh ba na ka daw jong katei ka jingjia baroh kito ki nongbylla ba wan na shabar ki la leit phai lut bad kumta ka ïa ki kam kaba ki trai muluk kim lah ban trei ka kam ka la sangeh bad la hap ban shu ieh noh.
