Nga dang kwah ban bteng ka jingshakri ha ka jylla kyrpang ban kyntiew bad pynroi ïa ka Mawsynram: Shangpliang

Shillong, Jylliew 1 : U MLA barim ka Mawsynram bad Nongpathai khubor ka National People’s Party (NPP) u Bah Himalaya M Shangpliang ha ka Lah Sngi U Blei ula pynpaw ba u dang kwah ban bteng ïa ka jingshakri ha ka Jylla bad kyrpang eh ban kyntiew bad pynroi pynpaw ïa ka Mawsynram. U la ong hooid ka kyrteng jongu ka paw ha ka thup jong ki kyrtong ka NPP sha Rajya Sabha hynrei um pat kwah ia mynta ka kynti.
“Nga sngew burom ba ka kyrteng jong nga ka la paw ha ka thup na ka bynta ka kam MP Rajya Sabha ha ryngkat bad ka kyrteng u James K Sangma bad bah Hamletson Dohling” ong u Bah Himalaya haba ïakren bad ki nongthoh khubor.
Haba niew ïa ka NPP kum kawei na ki party ba bat ïa ka synshar paidbah ha ka jingshem jong u, ula ainam ïa ka jingkiew jong ka naduh u snem 2018 hapoh ka jingïalam u Nongïalam ba tbit jong ka uba dei u Myntri Rangbah u Conrad K Sangma bad ïarap lang da ki arngut ki Symbud Myntri Rangbah-Bah Prestone Tynsong bad Ma Sniawbhalang Dhar”.
“Ngi la ïohi ba ki la don shibun ki jingkylla kiba kane ka party bad ka Sorkar ki la wanrah ha Meghalaya” ula ong. U Bah Shangpliang ula kdew ïa ka jingjied ïa ki lai ngut ki dkhot kum ka sakhi ïa ka jingïaid ka synshar paidbah hapoh ka party.
“Mano mano ruh ki lah ban long ki kyrtong ïa kum kine ki kam hynrei haba kut ka don tang kawei ka kam, kumta tang uwei u briew un leit” ula ong haba pynpaw ba ka rai ba khatduh ka shong ha u National President bad u State President.
“Wat lada nga leit sha Rajya Sabha, Nga don beit na ka bynta ka party hapoh ka Jylla” ong u Bah Shangpliang.
“Ngi don shibun kiei kiei kiba hap ban leh na ka bynta ki paidbah ka Jylla. Ngin shakri ïa ki paidbah, ngin pyrshang ban ïarap ïa ki paidbah bad wanrah kham bun ka roi ka par sha ki paidbah ka Jylla”.