SAFF Women’s Championship 2026: Khur POTM ka Sanfida ha ka jingjop ka India da 3 kol ïa ka Bangladesh

MARGAO, Jylliew 01: Ka India ka la pynliem ïa ka Bangladesh da 3-0 ban pynskhem ïa ka kyrdan ba nyngkong ha ka Group B jong ka SAFF Women’s Championship 2026 ha madan Pandit Jawaharlal Nehru Stadium ha Margao, Goa ha ka Sngi U Blei, 31 tarik Jymmang, 2026.
Ka thei ïalehkai jong ka jylla Meghalaya, ka Sanfida Nongrum, kaba la duh ïa ka jingïakhun ba nyngkong, ka la shah jied ban khur ïa ka khusnam Player of the Match na ka bynta ka jingïalehkai ba kyrpang jong ka ha pdeng madan (midfield).
Kane ka dei ka jingjop ba nyngkong jong ka kynhun phutbol ki kynthei jong ka ri India ïa ka Bangladesh haki hynñiew snem hadien ba ka la shah rem ha ki ar tylli ki jingïakhun ba mynshwa pyrshah ïa ka Bangladesh ha u snem 2022 bad 2024 jong kane ka lympung ïalehkai.
Ka Pyari Xaxa ka la pynkhihjar nyngkong ha ka minit kaba 36 jong ka kylla step shuwa ba ka Lynda Kom Serto (78′ p) bad ka Malavika P (90+1′) kin bynrap sa ar tylli ki kol ban pynskhem ïa ka jingjop.
Da ka khur 6 poiñ pura na ki ar tylli ki jingïakhun hadien ba ka la pynliem mynshwa ïa ka Maldives da 11-0 kol, ka India ka la pyndep ha khlieh duh jong ka Group B bad mynta kan ïakhun pyrshah ïa ka Bhutan ha ka Semi phainal ha ka 03 tarik u Jylliew ha ka por 8 baje janmiet. Katba ka Bangladesh kan ïakhun pyrshah ïa ka Nepal kham hashwa ha kawei pat ka Semi Final ha ka por 4 baje nohphai sngi.
Lah ban kdew ba ka la long ka jingkut kaba paka ïa ka jingïalehkai ba kyrpang jong ka India ha ka group stage katba ka kynhun ka la jam shakhmat sha ka semi-final ryngkat ka jingkyrmen bad ka jingsngewskhem ba ka lah ban ïoh biang ïa ka khusnam lahduh jong ka SAFF Women’s Championship hadien hynñiew snem.
Ki thei ïalehkai ka India kiba la mih madan pyrshah ïa ka Bangladesh: Panthoi Chanu Elangbam (GK, C), Purnima Kumari (Juli Kishan 90’), Nirmala Devi Phanjoubam, Shilky Devi Hemam, Sangita Basfore, Soumya Guguloth (Priyangka Devi Naorem 46’), Sanfida Nongrum, Astam Oraon, Pyari Xaxa (Malavika P 66’), Jasoda Munda (Karishma Shirvoikar 83′), Aveka Singh (Lynda Kom Serto 66′).