SHILLONG, Jylliew 01: Ka Diengpasoh SC bad ka Seila Sap F&CC ki la jop ïa la ki jong ki jingïalehkai ha ka Group E jong ka lympung U-20 4th Division Football League 2026 ba la pynïaid da ka Shillong Sports Association (SSA), hynne ka sngi Nyngkong ha madan SSA Stadium bad MFA, ha Polo.
Ka Diengpasoh SC ka la lah ba kan pynliem noh da tang 1-0 kol ïa ka Summit Academy lyngba ka kol ba la thep da u Kornilias Kharkukhi ha ka minit kaba 68 jong ka kylla miet.
Katba ka Seila Sap F&CC ka la jop da kaba suk da 4-0 pyrshah ïa ka Laitkroh SC, ha kaba baroh saw tylli ki kol kila wan ha ka kylla miet.
Hadien ka kylla step kaba khlem kol ka Seila Sap F&CC ka la pynkhihjar nyngkong lyngba u Freedy Umdor (49’min), nangta ka la pynbud sa lai tylli na u Nangtei Banshembha kharbangar (52’min), u Sashang Gurung (66’min) bad u Mebaniohnam Lyngdoh (73’min).
Ha kawei pat ka jingïalehkai jong ka Group E, hapdeng ka Mawnianglah Youth SC bad ka Umiew S&CO ka la kut ha ka jingïakhaid, ha kaba baroh arliang ki la thep mar shi kol (1-1).
Ka Umiew S&CO ka la ïoh ban lamkhmat tang hadien 6 minit ba la ïaid ka kylla miet lyngba u Ronishen Sten (46’min), hynrei ka Mawnianglah Youth SC ka la pynïakhaid noh ha ka minit kaba 52 lyngba u Kenneth Jyrwa.
Kin don lai tylli ki jingïalehkai jong ka SSA U-20 4th Division Football League 2026 ha kane ka sngi Ba-ar (02.06.2026). Ha ka por 1 baje mynsngi ha SSA Ground, ka Phir Kurbah MSS&CC kan aireng ïa ka Lumkseh SC, nangta ka Riatsamthiah SC kan ïakhun pyrshah ïa ka Them Rangshken SC ha ka por 4 baje nohphai sngi (baroh kidei jong ka Group A). Ha ka por 4 baje nohphai sngi ha MFA Ground ka Iaitylli S&CC kan aireng pyrshah ïa ka Pommura SC (Group F).
