Shillong Jymmang 31: Ka Khasi Students’ Union Tyrso Unit hadien ba ïoh ki jingujor na ki paidbah halor ka jingjia aksident ka ba ïai jia man ka por ha ki thaiñ Tyrso bad ka Seng KSU ka la mih shakhmat ban maham tyngeh ïa kito ki briew ban pynher sted ïa ki kali jong ki.
Na ka liang u President ka KSU Tyrso unit u bah Playerfull Mashli President u la kyrpad ïa ki driver kali ba kin ñiah suki ïa ki kali jong ki nangne shakhmat bad maham ïa ki driver kali kiba kamai ha ki thaiñ Tyrso ne kiba wan sha ki thaiñ Tyrso ba kim dei ban ñiah sted palat ïa ki kali khamtam ha ka por ba ki khynnah skul ki dang wan skul bad ha ka por ba wai skul. U la kyntu ïa ki nongñiah kali ba ki dei ruh ban ñiah ïa ka speed limit kaba 30 hapoh.
Ha ka kyrwoh khubor utei u nongïalam u la ong lada ka Seng ka lap ba dang don ki ba leh pyrshah ka seng kan leh da kaba tyngeh bad pynshitom wat ban ai sha ki bor jong ka aiñ, ka seng ka kyrpad ruh ïa ki paidbah lada ki lap ba ki driver ki pynher sted dei ban pyntip sha ka seng, bad na ka liang jong ka seng ka kyrpad ruh ïa ki nong ñiah kali ba kin ai ka jingïatreilang khnang ban wanrah jingsuk hapoh shnong Tyrso area hi baroh kawei.
