Ka jingphah lum Khanasamari bad elekshon kan ym ktah ïa ki nonghikai: President SSA

Shillong, Jymmang 31: U President ka Meghalaya SSA Schools Association Central Body u Babu Aristotle C Rymbai haba kren sha ki lad pathai khubor u la ïathuh ba ka jingphah leh census bad phah duty elekshon ka Sorkar ïa ki nonghikai kan ym ktah than ïa ki naba kadei kaba shisien 10 snem bad kumjuh ruh shisien sansnem bad ki leh ïa kane ruh hadien ba la wai skul.
U la batai ruh ba ha ka RTE Act la dep batai ba ka dei hi ka kam ban leh da ki nonghikai ban don ka jingkitkhlieh na ka bynta ka ri bad ka jaitbynriew.
U la ïathuh ruh ba ka Sorkar ka khlem phah leh ei hynrei ka da ai da ka bai nong (honorarium) kaba long kumba T. 25 hajar kumta ha ka jingsngew jong u shimet kam da ktah than ban ïapyrshah ïa kane naba kadei ka kamram bad jingkitkhlieh.
Shuh shuh u Babu Rymbai u la ong ba ki kam phah leh Census bad election duty la aiti sha ki nonghikai kim dei tang ki kam shakri paidbah hynrei ki dei ki kamram kiba long nongrim hapoh ka Right to Education Act.
U la ong, “Ngim pyrshah ïa kum kine ki kamram hynrei kum ki nongshong shnong kiba don jingkitkkhlieh ngi dei ban leh ïa la ka bynta jong ngi.”
U Babu Rymbai u la ong ba ki nonghikai kiba la shah hikai ban pynwandur ïa ka lawei ka jylla, ki long kiba kyrpang ban leh ïa kine ki jingkitkhlieh.
Haba ithuh ïa ka jingdonkam jong kine ki kam, u Babu Rymbai u la kyntu pat ka sorkar jylla ban pynthikna ba kam dei ban pynkhia pat, khamtam da kaba pyrkhat ruh ïa ka eksam MTET kaba dang ïaid.