Shillong, Jymmang 30: U Lat ka Jylla u C H Vijayashankar ula lum ïa ka jingïalang ha Lok Bhavan bad ki khynnah kiba la ïoh ïa ka jingmyntoi na ka Post-Matric Scholarship (ST) bad ula pynthikna ïa ki khynnah pule ba ka jingsngewkhia halor ka jingïoh slem bad ki jingeh kiba la mih kin dei kiba un shimkhia bad ki bor kiba dei khmih ba kin pynbeit noh.
La ong ba kane ka jingïakynduh kadei shi bynta jong ka “Birsa Lives in New Bharat” ïa kaba la pynlong ha ka ri baroh kawei ïa ka jingrakhe ïa ka Janjatiya Garima Utsav naduh ka 10 tarik u Jymmang haduh ka 9 tarik u Jylliew 2026. Kane ka jingrakhe ka long kum ka jingburom, ka jingsah nam jong ki barim bajah, ka jingnoh synniang bad ka jingseisoh jong ki jaidbynriew riewlum bad ban pyni ruh ïa ki skhim ban pynkup bor ïa ki riewlum.
Kiwei kiba la don ki long u Additional Chief Secretary jong u Lat ka Jylla u HC Chaudhary, u Commissioner and Secretary ka tnad pule puthi u Bah Ryntihlang Rapthap bad ki ophisar na ka tnad pule puthi ruh kila donlang ha kane ka jingïalang, nalor kiwei pat.
Shuh shuh ha kane ka jingïakynduh, u Lat ula ïakren markhmat bad ki khynnah pule na ki skul na ki district ki bapher bapher jong ka jylla bad ula pan ruh ïa ka jingshem ka jong ki halor ka jingpyntreikam bad ka jingïoh jingmyntoi na ka Umbrella Post-Matric Scholarship Scheme ïa ki khynnah pule kiba dei ki Scheduled Tribe.
Na ka liang ki nongïoh jingmyntoi kila ong, ba ka scholarship ka la ïarap ha ka ban pynlut pynsep ha ka pule puthi kum ka jingsiew ïa ka bai khreh kot, ka bai ïaleh eksam, ka jingsiew ïa ka jingsah Hostel, ban thied ïa ki kot bad kiwei kiwei ki jingdonkam kiba ïadei bad ka pule puthi. Kila pynpaw ba ka scheme ka la pynduna ïa ka jingeh ha ka pisa pilaiñ jong ka ïing ka sem bad ka la plie lad ïa ki ba kin bteng ïa ka jingpule ka jong ki da ka jingskhem jingmut.
Ki khynnah pule kila pynpaw ruh ba kane ka skhim ka la wanrah ïa ka jingkylla ha ka ban kyntiew ïa ka jingpynkupbor ha ka pule puthi, ka jingïohlad kaba mar katjuh bad ka jingïashimbynta bha ki samla riewlum ha ki jingpule ki bapher bapher.
Ha kajuh ka por bun ki khynnah pule kila pynpaw ïa ki jingeh kaba ki mad kaba kynthup ïa ka jingpynshisha lyngba u Aadhaar, ka jingslem ha ka ban pynshisha ïa ki kot ki sla, ki jingeh kaba ki mad haba ki leh ïa ka online portal, jingslem ha ka ban ïoh ïa ka scholarship bad jingduna palat ha ka ban ai ïa ki jingpynsngewthuh ïa ka rukom aplai na ka bynta ki khynnah pule kiba na ki jaka nongkyndong.
Ha kaba ïadei bad kitei ki jingsngewkhia, u Lat ula pynthikna ïa ki khynnah pule ba kane ka jingai jingtip kaba kordor ka jong ki kadei kaba yn sa pyntip sha ki bor kiba dei khmih ba kin leh ïa kaba donkam.
Ula banjur ïa ka jingdonkam, “Ban pynkhlaiñ ïa ki jingai jingpynsngewthuh, ban pynsuk ïa ka rukom aplai, ban kyntiew ïa ki lad ban ai jingkyrshan bad pynthikna ban pynbeit mardor ïa kitei ki jingeh khnang ba yn ym don kino kino ruh ki khynnah pule riewlum kiban duh ïa hok jong ka jingïoh jingmyntoi na ka scholarship scheme.”
Na ka liang u Lat ula ong, “Ki khynnah pule ki dei ki lawei jong ka imlang sahlang bad ka jingpynang pynstad ïa ki kan ïalam ha kaban pynneh pynsah ïa ka kolshor tynrai, ban pynkhlaiñ ïa ka jinglong nongïalam hapdeng ki samla riewlum bad ban tei ïa ka ri kaba khlaiñ bad kaba long salonsar ïa baroh”.
Ula pynshlur ïa ki ba kidei ban long kiba kut jingmut ha ka jingpule ka jong ki, ban pyndonkam pura ïa ka lad kaba ki ïoh na ki sienjam kiba la shim da ka sorkar bad ba kin ïakhun tyngeh ban pynseisoh ïa ka thong ka jong ki.
U Lat ula pynpaw ba ka pule puthi kadei kawei na ki atiar kaba khlaiñ tam bad kaba lah ban wanrah ïa ka jingkylla ïa ka imlang sahlang bad ïa ka ïoh ka kot jong ki jaidbynriew riewlum bad ka ong, ba ki scholarship scheme ka sorkar kila plie lad ïa ki khynnah kiba dei hok na ki thaiñ nongkyndong bad kiba duna ha ka ïoh ka kot ba kin bteng ban pule ha ki kyrdan kiba heh bad ban pynurlong ïa ka jingangnud ka jong ki.
Kane ka Umbrella Post-Matric Scholarship Scheme ïa ki ST Students, kadei kaba la bei tyngka Ministry of Tribal Affairs, kaba ai jingïarap pisa ïa ki samla riewlum ne Scheduled Tribe kiba pule ha ki kyrdan kiba shajrong.
