Ka Chintan Shivir ha IIM Shillong ka pynkhreh ban pynkhlaiñ ïatreilang bad ki samla ha ki shnong

Shillong, Jymmang 30: Ka Tnad Youth Affairs, ka Tnad Youth Affairs & Sports, ka la sdang ïa ka sngi ba nyngkong jong ka Chintan Shivir kaba ar sngi ha Indian Institute of Management (IIM), Shillong, ha kaba la ïadonlang ki ophisar jong ka Tnad, ka MY Bharat bad ka National Service Scheme (NSS) na ka bynta ban ïamir jingmut halor ka jingpynkhlaiñ ïa ka jingïatreilang jong ki samla, kyntiew ïa ka jingpynpoi ïa ki prokram bad kyntiew ïa ka jingthmu jong ka Viksit Bharat lyngba ka roi ka par ba ïalam da ki samla.
Ha ka jingïalang plie paidbah la ïadonlang u Myntri Sorkar Pdeng ba dei peit ïa ka Tnad Youth Affairs & Sports, Dr. Mansukh Mandaviya, ka Myntri Khynnah jong ka sorkar pdeng ba dei peit ïa ka Tnad Youth Affairs & Sports, ka Raksha Nikhil Khadse, Myntri ka Tnad Sports & Youth Affairs, Sorkar Meghalaya, Bah Wailadmiki Shylla, Secretary, Tnad Youth Affairs, Dr.Pallavi Jain Govil, Additional Secretary, Tnad Youth Affairs, Nitesh Kumar Mishra, Chief Executive Officer, MY Bharat, Dr. Priyanka Shukla, ryngkat bad ki heh ophisar jong ka Tnad, ka MY Bharat, NSS, ki Regional Director, ki District Youth Officer bad ki Youth Officer na kylleng ka ri.
Haba ai jingkren ha ka jingïalang, u Dr. Mansukh Mandaviya u la ong, “Mynta, da 2.17 klur ngut ki samla kiba trei mon sngewbha, ka MY Bharat ka la paw kum ka jingïakhih jong ka ri na ka bynta ka Jan Bhagidari. Ka thong jong ngi kalong ban rah ïa ka My Bharat sha man la ki distrik, man la ki block, bad man la ki samla nongshong shnong ban pynthikna ïa ka jingpynïasohlang ïa baroh.”
U Myntri u la ban jur ba ki National Youth Volunteer kidei ban long kum ki nongïalam ha ka imlang sahlang bad ki nongpynshlur ïa ki samla ha ki jaka nongkyndong. U la ban jur ïa ka bynta kaba kongsan jong District Youth Officer bad ki NSS Officer ha kaba pynkhlaiñ ïa ka jinglong jingman jong ka jingkyntiew ïa ki samla bad u la ban jur ïa ka jingdonkam ban thew ïa ka jingjop lyngba ka jingktah kaba lah ban ïohi bad ki jingmih.
U la kyntu ruh ïa ka jingïashim bynta shitrhem jong ki samla ha ka campaign pyrshah ïa u drok ha ka ri baroh kawei naduh ka 26 tarik u Jylliew haduh ka 15 tarik u Nailar, u la pynbna ïa ki prokram ha ki 150 tylli ki jaka pule ban kynmaw burom ïa ka jingdap 150 snem ka Vande Mataram, bad u la pynkynmaw biang ïa ka jingkut jingmut jong ka Tnad ban sdang ïa ki MY Bharat Centre ha baroh 783 tylli ki distrik. Haba ban jur ïa ka jingdonkam jong ka jingïoh jingnang jingstad lyngba ka jingïatreilang, u la kyntu ïa ki jylla ban ïasam ïa ki rukom treikam kiba bha tam bad u la kyntu ïa ka jingpynïasoh kaba kham bha hapdeng ki samla na ka thaiñ shatei lammihngi ha ki sienjam ban kyntiew ïa ka ri.
Ka Myntri Khynnah kaba dei khmih ïa ka tnad Youth Affairs & Sports ka Raksha Nikhil Khadse ka la ong, “ka thong jong kane ka Chintan Shivir ka dei ban wanrah lang ïa ki ophisar ba kin ïamir jingmut, pyni ïa ki rukom treikam kiba biang tam bad ki jingshem ha ki jaka treikam khnang ba ngin lah ban ïatreilang na ka bynta ka Viksit Bharat 2047 lyngba ka bor jong ki samla jong ngi.”
Haba ïadei bad ka thaiñ shateilammihngi, ka la kren shaphang ka kam ïalehkai kaba khlaiñ ha ka thaiñ bad ka jingïadei jong ki klob samla bad ka la ban jur ïa ka jingdonkam ban pyndonkam ïa ka sap bad ka bor jong ki samla jong ka. Ka Myntri ka la pynpaw ruh ïa ka jingdonkam ban pynkhlaiñ ïa ka jingïatreilang bad ki sorkar jylla bad ki bor synshar district, da kaba ong ba ka jingpynbeit ïa ki jingduna ha ka jingïadei ka long kaba kongsan na ka bynta ban pyntreikam hok ïa ki prokram bad ki kam jong ka MY Bharat Portal.
Ka Secretary, ka tnad Youth Affairs, Dr. Pallavi Jain Govil ka la ong, “Ka thong kaba kongsan jong kane ka Chintan Shivir ka dei ban lap ïa ki jingeh, pyni ïa ki jingshem bad wanrah ïa ki kam ba lah ban pyntreikam.”
Ka la ong ba ki bynta ba nyngkong bad ba ar jong ka Chintan Shivir ki la wanrah ïa ki jingjop ba kongsan. Ka la pynshlur ruh ïa ki nongïashim bynta ban batai shaphang ki rukom treikam kiba biang tam bad ki rukom treikam ba thymmai kiba lah ban pynbud ha ki jylla bad ki prokram bapher bapher.
U Additional Secretary, ka tnad Youth Affairs, Nitesh Kumar Mishra u la ong, “ka Chintan Shivir ka dei ka rynsan na ka bynta ka jingïamir jingmut lang ha kaba ki ophisar ki lah ban ai ïa ki jingmut kum kiba don bynta ha kane ka kam bad noh synniang sha ka lawei jong ki sienjam kiba ïadei bad ki samla.”
U la ong ba ki jingai jingmut na ki bynta kiba la dep ki la ïalam sha ki sienjam kiba lah ban pyntreikam bad ula ban jur halor ka jingdonkam jong ka National Volunteering Policy ban ithuh bad pyni ïa ka jingnoh synniang jong ka MY Bharat bad ki nongtreimon sngewbha jong NSS kiba trei ha ki kam ban tei ïa ka ri.
Ha shuwa kane, ka Dr. Priyanka Shukla, CEO, MY Bharat, ka la pdiang burom ïa ki nongïashim bynta bad ka la batai shaphang ki kam ba kongsan bad ki rukom pyntreikam hapoh ka Annual Action Plan. Ha ka sngi ba nyngkong ka la don ki bynta shaphang ka jingkyntiew ïa ki nongïalam, ka jingpynkhreh kam na ka bynta u snem, ki kam kiba biang tam jong ki kynhun jong ki samla, ki kam digital ban pynïadei bad ki samla lyngba ka rynsan MY Bharat, ki prokram kiba pyndonkam ia ki jingpyrshang ba thymmai ban ïoh jingnang jingstad, ki lad ban trei mon sngewbha bad ka jingpynkhlaiñ ïa ki rukom treikam hapoh ka MY Bharat bad NSS.
Ki nongmihkhmat na Assam, West Bengal, Bihar, Jharkhand bad Manipur ki la batai shaphang ki rukom treikam kiba seisoh bha bad ki jingshem na ki jaka treikam kiba ïadei bad ka jingïadei bad ki samla, ka jingpynrung kyrteng hapoh ka rynsan, ki kam trei mon sngewbha bad ka jingïadei bad ka imlang sahlang, ka jingplie lad ïa ka jingïoh jinghikai lang jong ki nongïashim bynta.
Ki jingïamir jingmut ha ka sngi kaba nyngkong ki la peit ïa ka jingpynkhlaiñ ïa ki kam kiba ïadei bad ka jingïadei bad ki samla, ka jingkyntiew ïa ka jingpynïahap jong ki kam jong ki jaka treikam, ka jingkyntiew ïa ki jingseisoh jong ki kam bad ka jingwanrah ïa ki jingpynbeit ba lah ban pyntreikam na ka bynta ki sienjam kiba ïadei bad ki samla ha kylleng ka ri.