SHILLONG, Jymmang 29: Ka Mawphlang SC bad ka New Challenger FC ki la jop da kaba suk ïa la ki jong ki jingïalehkai Group D ha ka lympung Shillong Sports Association U-20 Fourth Division Football League 2026, kiba la long hynne ka sngi Thohdieng ha Polo.
Ha SSA Ground, u Arkidonlang Hujon (30, 47 & 62’min) u la thep hat trik ha kaba ka Mawphlang SC ka la pynjemkhnap da 7-0 ïa ka Mawshbuit SC. Ki saw tylli kiwei pat la thep da u Kerius Rymbai (51’), u Albertstar Mawlong (68’), u Kestar Kharshiing (73’) bad u Lestarroy Mawlong (80+1).
Nangta ha MFA Ground ka New Challenger FC ka la pynliem noh da 4-0 ïa ka Pynthorbah SC. U Khrawpyrkhat Lyngkhoi (13’), u Bobinchal Wanniang (50’) bad u Damelashaing Mawlieh (69’) ki la pynkhihjar mar shi sien. Ka la don ruh ka kol ba la kum thep hi (Own Goal) da u Deibormi Pyngrope ha ka minit kaba 55.
Kan don tang kawei ka jingïalehkai ha kane ka sngi Saitjaiñ (30.05.2026) ban long ha ka por 1 baje mynsngi, hapdeng ka Nongpuir SC pyrshah ïa ka Nongkseh United FC ha SSA Ground.
