Shillong, Jymmang 28: Ki nongialam jong ka All Meghalaya Commercial Vehicles Forum (AMCVF) ha ka sngi Palei ki la ong ba ym pat ju jia satia ba kano kano ka sorkar kan shu mab ei ïa ka kuna bad ka khajna kaba dei ban ïoh da ki spah spah klur na ki kali kamai.
Haba kren bad ki lad pathai khubor, shisngi hadien ba ka sorkar jylla ka la pynbna ba ka la mab haduh 90 persen ka kuna (Fitness Certificate) ïa ki kali kamai bad 80 persen pat na ka bynta kiwei ki khajna kali (Goods & Passengers Tax), ki nongïalam ka synjuk ki la ong ba ka sorkar MDA ka dei kaba nyngkong eh hapoh ka Ri India ban mab ei haduh 900 klur ka khajna ba ki dei ban ïoh na ki kali kamai.
Na ka liang u Bah Soomeyo Sayoo, President ka Synjuk haba kren sha ki lad pathai khubor ula ong ba ka 27 tarik Jymmang 2026, kadei ka sngi ka ban sah jingkynmaw ïa ki trai kali bad ki nongniah kali kamai ba kynthup naduh ki kali rit, ki kali Tourist, ki bolero pickup, ki trok bad kiwei kiwei ki kali sorkar namar ka Sorkar Jylla kala rai ban mab ïa ka khajna kaba ki khlem lah shuh ban siew.
“Kane kadei ka Sorkar kaba nyngkong eh hapoh India ban pyrkhat naka bynta u kup shilliang, u sem shilliang, u rit u ria, u duk u suk, namar ka la mab bad ailad ïa ngi ban siew noh satang 10% ka kuna jong ka Fitness bad 20% ka kuna jong kiwei ki Tax,” u la ong.
U President u la ong ba jing mab noh ka sorkar ïa ka kuna kan ktah bha ïa ka pla tyngka jong ka Sorkar Jylla namar baroh ki tip ba ka Meghalaya kadei ka Jylla kaba duna bha ka lad ban lum khajna na ki paidbah.
“Hoid namar ka jing mab noh ïa ka kuna jong ngi kaba kot palat 900 klur, kan wanrah ka jingduhnong ïaka Sorkar hynrei ngi tip ba ki nongïalam jong ka Sorkar da ka jingïohi jngai bad daka jingpyrkhat ïa la ki paidbah ki la kloi ban mab ïa ka kuna jong ngi” ula ong.
Shuh shuh u ong ruh ba kum ki nongtreikam kiba don bynta ha ka kit ka bah bad ha ka kamai kajih u kwah ban pynpaw ba kane ka Sorkar kam shym la ïarap tang ïa kiba don kali heh, hynrei ka la ïarap naduh kiba don kali rit, ki kali Tourist, ki bolero pickup bad kiwei kiwei. “Kane ka Sorkar ka la khmih lynti bad ka la pynïaid ha kata ka rukom ba ngin ïoh jingïarap na ka por sha ka por” u la ong.
U Nongïalam ka AMCVF u la kyntu ruh ïa ki trai kali bad nongnïah kali ba kin shim ïa kane ka kabu ksiar ba ai ka sorkar bad kin sdang ban siew tista noh ïa ka bai pynthymmai ïa ki kot kali bad ïa ka khajna hapoh ka por ba la buh.
