Ki paidbah mynta ki jied nongmihkhmat na ka jingshongshit ha ki Social Media: Kong Grace

Shillong, Jymmang 28: Ka President jong ka National People Women Front (NPWF) kaba dei ruh ka MDC jong ka Nongshkem ka Kong Garce Mary Kharpuri kala kynthoh ba ka kam jingjied nongmih khmat, mynta kam dei shuh ka jingjied da ka jingsngewthuh hynrei la jied na ka jingshong shit lyngba ki social media.
Ïa kane ka Kong Grace kala kren ha ka jingialang ïalap election ïa u kyrtong ka NPP u Dr DRL Nonglait ha Mawsynram mynta ka sngi.
“Ka long kaba sngewsih ba mynta haba jied ïa ki nongmih khmat kim jied shuh da ka jingsngewthuh bad ka jingjied da ka mon laitluit” kala ong bad bynrap “Wad shwa ïa ka jinglong tynrai jong u kyrtong shwa ban rai ban jied ïa ki nongmih khmat” ong ka Kong Grace.
Shuh shuh ka Kong Grace kala ong ba ka dor jong ka burom bad akor ban peit ha ki social media kala hiar dor bha bad la ijli ban peit ïa ki jingkynthoh hynrei kala ong pat ba ha ka por election ka bor ka shong ha u paidbah ban rai.
“Kiba la ïoh ban thep vote kidei kiba la kynjoh 18 snem shaneng bad kim dei shuh ki khynnah, te haba phi jied ïa ki nongmih khmat da jingjied da ka jingshemphang jied da ka jingstad ym ban shu bud tynneng” ong ka Kong Grace.
Ka Kong Grace kala ong, “Mynta lah shi snem tam wat tang shi na ïa ym pat ïoh scheme ha KHADC naduh ba synshar ka VPP, hynrei ha kip or barim ka KHADC ka trei shitom namar ba ki don ki lad ki lynti (channel) ha Delhi kiba lah ban pynïoh scheme”.
Shuh shuh kala ong ba mynta ki don ki MDC kiba leit ban plie ïa ki scheme MDC, Ngan ong sha phi ba kine ki scheme kidei ki scheme kiba rim namar ba ki MDC ba mynta kim pat ïoh scheme.