Shillong, Jymmang 28: Ka Centrepoint Group ka pynrem jur ïa ka jingjia kaba sngewsih bad pynkyndit mynsiem jong ka jingwan rung jubor bad thombor kaba la jia hynne ka sngi ha ka shnong Laitkynsew, ha ka jaka ba dang shna ïa ka resort project jong ka ba tip kum ka Rikynjai 2.
Katkum ka kyrwoh ba la phah da u Bah Larsing Sawyan Managing Director ka Centrepoint Group Enterprise, kane ka la jia ha ka por kumba 2:45 baje mynsngi haba ka kynhun kaba don kumba 15 ngut ki samla ki la wan rung khlem jingbit sha katei ka jaka trei bad sdang ban byrngem bad thombor ïa ki nongtrei kiba don ha katei ka jaka. La ïathuh ba ha kane ka jingjia bun ngut ki nongtrei ki la mynsaw jur bad uwei na ki, u Rajkumar Sharma u la mynsaw jur ha ka khlieh bad don mynta ha ka jingshah sumar ha hospital.
“Ngi sngewkhia jur halor kane ka kam thombor bad kam be-aiñ,” ong ka kyrwoh khubor.
“Ngi kyrpad ïa ki bor sorkar ban shim mardor ïa ki sienjam kiba tyngeh pyrshah ïa kiba donkti bad ban pynthikna ïa ka jingshngaiñ jong ki nongtrei bad ki jaka treikam ha kylleng ka jylla,” ong shuh shuh ka kyrwoh.
“Ngi kyrpad ruh ïa baroh ki paidbah ka jylla ban mih shakhmat ban pynrem ïa kum kine ki kam thombor namar kine ki kam ym tang ba ki ktah ïa ka roi ka par hynrei ki buh jingma ruh ïa ka jingshngaiñ jong ki jong ngi hi kiba trei bad pule shabar,” pynkut u Bah Larsing Sawyan Managing Director Centrepoint Group Enterprise ha ka kyrwoh.
