Shillong, Jymmang 28: Ka Nongkseh SSCC bad ka Rymbai Shkenshynriah SC kin ïa aireng ban ïaknieh ïa ka jaka ha ka phainal jong ka 5th Meghalaya State League ynda kine ki arliang kin ïakhun ha kane ka sngi Thohdieng ha ka semi final ba nyngkong ha ka por 6 baje janmiet ha madan First Ground-SSA Stadium, Polo.
Ka Nongkseh ka la rung sha ka Semi final kum ka nongjop ha ka Group A ha ki jingïalehkai Quarterfinal league stage, katba ka Shkenshynriah ka la pyndep kyrdan ba ar ha ka Group B.
Na ka liang jong ka Shkenshynriah, kane ka kynhun ka la poi teng sha ka semi final ha ka MSL 4, ha kaba ka la rem noh lyngba ka penalty shootout pyrshah ïa ka Shillong Lajong FC. Ka dei ruh ka kynhun ba marwei napdeng ki saw tylli kiba poi sha ka semifinal ka bym dei tynrai na nongbah Shillong.
Kane ka kynhun kaba na East Jaiñtia Hills ka la rung lyngba kum ka kynhun ba ha khlieh duh na ka Group D ha ka wat ïakhun ba nyngkong bad hadien kata ka la pynliem noh ïa ka Amlarem SC ha ka Round of 16.
Katba na ka liang jong ka Nongkseh, kane kadei ka sien ba nyngkong ba kan ïashim bynta ha ka MSL. Hynrei ka jingdon jong katto katne ngut ki nongïalehkai ba shemphang kiba la mih madan teng ha ka I-League, ka kynhun ka la lah ban kiew bha ha ka jingïalehkai.
Ka dei tang ma ka ka kynhun kaba khlem shah rem ha kane ka league haduh mynta, watla ka la ïakhaid lai sien. Ka don ruh ïa ka jingkyrshan kaba khraw na ki paidbag bad kane kan long kaba kongsan bha katba ki dang ïakhun ban poi sha ka phainal.
ïa ki tiket lah ban ïoh ha katei ka jaka ha ka dor kaba sdang naduh T.100 haduh T.300. Ki nongpynïaid ki la kyrpad ïa ki nongkyrshan ba kim dei ban rah ïa ki bilor um, ki tiar pynmynsaw, lane kino kino ki tiar kiba beaiñ shapoh ka Stadium. La khang pyrshah ban dih duma bad dih kyiad hapoh katei ka jaka.
