SHILLONG, Jymmang 28: Ka Weilyngkut Area FCC bad ka Golflink SC ki la jop ïa la ki jong ki jingïalehkai jong ka Group B ha ka lympung U-20 Fourth Division Football League 2026 ba la pynïaid da ka Shillong Sports Association ha madan MFA hynne ka sngi Palei.
Ha ka jingïakhun jong ka Group B pat la sakhi ïa ka Laitlulong SC kaba la pynliem noh ïa ka Lumpyngngad SC da 3-0. Kine ki lai kol la thep da u Luckystar Ryntathiang (13’min), u Bakhrawjingmut Diengdoh (42’min) bad u Paul Kurbah (55’min).
Ka jingïalehkai ba nyngkong la sakhi ïa ka Weilyngkut Area FCC kaba la pynliem noh da 4-1 kol ïa ka Mawlyngngad SC.
Ka Weilyngkut Area FCC ka la pynkhih ar tylli ki kol ha ki minit pynjlan shuwa ban jam sha ka por shongthait lyngba u Dapjingkmen Kurbah (40+2’) bad u Kaliwan Roin (40+5) shuwa ba u Bhabok Kurbah (71 & 80’) un bynrap sa ar tylli ha ka kylla miet. Ka Mawlyngngad SC ka la pynphai kawei lyngba u Nangialammane Kharmalki (77’min).
Nangta ka Golflink SC ka la pynkhihjar ar sien ha ka kylla step lyngba u Dibian Suting (2 & 14’min) ban pynliem ïa ka Madanrting SC da 2-1 kol. Ka Madanrting SC ka la ïohlad ban pynphai kawei lyngba u Shanlang Kharkongor ha ka minit kaba 55.
Kin don ar tylli ki jingïalehkai SSA U-20 4th Division Football league 2026 ha kane ka sngi Thohdieng (29.05.2026) ban sdang ha kajuh ka por, kata 1 baje mynsngi. Ha SSA Ground ka Mawshbuit SC kan ïakhun pyrshah ïa ka Mawphlang SC; nangta ha MFA Ground, ka New Challenger FC pyrshah ïa ka Pynthorbah SC. Baroh ar kidei jong ka Group D.
