Nongstoiñ, Jymmang 28: Ka jingpynbha ïa madan kynjat bol ha Domsohphlang kaba hap hapoh u pud u sam jong ka shnong Markasa Mawthadraishan Block Estern West Khasi hills district ka la long ka jingkyrkhu kaba khraw ïa ki samla jong katei ka thaiñ kaba kynthup ïa ki bun ki shnong kiba hap ha ka Mawthadraishan Constituency.
Ha kaba ïadei bad ka jingpynbha ïa katei ka madan kynjat bol ha ka jingleit peit jong u nongthohkhubor jong u Mawphor la ïoh ban ïaren bad u bah R.Syrpailin Sohlang Sordar ba rim jong ka shnong Markasa uba bat mynta kum u Secretary jong ki trai khyndew madan Domsohphlang, u la ïathuh ba ïa katei ka madan la pynbha bad pynbit pynbiang na ka bynta ban siang da u phlang plastic (Artificial turf ) bad dei ha kine ki snem ba la dep mynba u bah Shakliar Warjri MLA ka Mawthadraishan u dang bat kum u Myntri jong ka tnad Sport & Youth Affair ha ka sorkar jylla ba u la trei shitom bad u la pynïoh ïa ka skhim kaba shiphew klur tyngka.
U bah Sohlang u la ïathuh ruh ba naduh ba ka jingpyntrei ban pynbit pynbiang nadong shadong ïa katei ka madan ka long kaba sted bad kaba ïaid beit bha naduh ba sdang la pynïaid ïa ka jingpyntrei da u Chiefe Engineer jong ka State Sport Council jong ka jylla.
Ha kajuh ka por u la ong ba lada phai sha ka constituency baroh kawei ym lah ban len ba lyngba ka jingdon jong u bah Shakliar Warjri kum u nongmihkhmat uba don ruh bad ka sorkar ka la long ka jingkyrkhu kaba khraw ïa ka constituency baroh kawei.
U la ong ruh ba ki dak ki shin jong ka jingtrei shitom jong u ka la long ka jingkyrkhu kaba khraw ïa ki paitbah ka constituency baroh kawei. Nalor kata u la ong ruh ba ki dang don shibun bah ki kam pynroi bad ki jingïarap na ka sorkar kiba utei u nongmihkhmat un dang pynpoi sha ki paitbah hapoh ka constituency wat la um shym la bat shuh kum u Myntri sorkar ruh.
