Shillong, Jymmang 26: Ka Meghalaya Bharatiya Janata Party (BJP) ha ka sngi baar ka la ai khublei ïa ka Sorkar Pdeng ba ïalam da u Myntri Rangbah duh ka ri u Narendra Modi, kaba la pynkupburom da ka khusnam Padma Shree ïa u Bah Hally War na ka bynta ka jingtrei jong u ha ka ban thaiñ bad pynheh pynsan ïa ki jingkieng Jri hapoh ka jylla.
Katkum ka kyrwoh khubor na ka liang ka BJP ka la ong, “U Myntri Rangbahduh Narendra Modi ba ïalam ïa ka Sorkar Pdeng u la pynpaw sa shisien ïa ka jingnoh synñiang jong ka Meghalaya sha ka ri da kaba ai khusnam ïa u Bah Hally War na ka bynta ka jingaiti lut jong u ban tei bad pynroi ïa ki jingkieng Jri, ka pateng bad kumjuh ruh ka dak jong ka Jylla jong ngi.”
Na ka liang u Bah Kharkrang uba dei u nongaiktien jong ka BJP u la ong ba kane ka khusnam ka la wanrah sha ka jingshai ïa ka jingstad hyndai jong ka Meghalaya bad ka buit shna jingshna kaba khlem pynmih ïa ki jingjaboh.
U la bynrap da kaba ong, “Katba ngi dang pynpaw ïa ka jingsngewnguh kaba khraw ïa ka Sorkar Pdeng, ngi thikna ba namar ka nam bad ka jingai jingithuh ia u Bah Hally kadei ruh ka jingithuh ba kyrpang ia ka Jylla jong ngi haba ïadei bad ka mariang ka ban long ka nuksa na ka bynta ka jaitbynriew baroh kawei, kaba thaw ïa ka lawei kaba neh na ka bynta ka ri India.”
Ka BJP ka la kdew ba ka khusnam Padma Shree jong u Bah Hally ka ka wan hadien ka jingïoh khusnam Padma Shree jong ka Kong Silbi Passah ha u snem 2024.
Ka la kdew ruh ïa ka jingkren jong u Myntri Rangbahduh dang shen ha ka ‘Mann Ki Baat’, ha kaba u la kdew ïa ka jaiñ Eri Silk jong ka Meghalaya.
Shuh shuh u nongai ktien ka BJP u la bynrap, “U Myntri Rangbah duh ba donburom bad ka Sorkar Pdeng ha kawei pat ka liang ki dang ïai bteng ban ithuh ïa ka pateng ba phylla jong ka Jylla. Ka daw balei, ngi pynpaw ïa ka jingsngewnguh jong ngi sa shisien.”
Ka khusnam Padma Shree ka dei ka khusnam kaba saw napdeng ki khusnam heh tam ha India ba ai shaki riew paidbah.
