Shillong, Jymmang 26: U MLA bad MDC barim jong ka Nongkrem Constituency u Bah Lambor Malniang, mynta ka sngi ka 26 tarik u bnai Jymmang u la leit paidbah ia ka jingkieng iaid kali ne ka motorable road kaba u la ai sngewbha nap la lajong sha ka Umphyrnai Presbyterian Secondary School.
Kum ban shu kdew u Bah Lambor Malniang ha ka 10 tarik u bnai Nohprah 2025, ha ka por ba kane ka skul ka rakhe ïa ka jingdap 75 snem ha kaba la wan ban sakhi lang ruh da u Myntri Rangbah ka jylla u Conrad K Sangma ha kaba u Bah Lambor u la kular ba un sa phah shna da ka jingkieng ban rung sha kane ka skul na ka bynta ban shngain ki khynnah skul ha ka leit ka wan.
Kane ka jingkular u Bah Lambor kala wan ban urlong tang hadien san bnai bad mynta ka sngi u la ioh ban plie paidbah ha ka jingsakhi lang ki nongialam ka Balang ba kynthup naduh ki Tymmen Basan, ki Rangbah Balang, u Sordar ka shnong Umphyrnai bad u Secretary.
Haba khren ha ka jingialang ba plie ïa kane ka jingkieng u Bah Lambor u la ong, ka jingthmu ba shna ïa kane ka jingkieng ban poi sha kane ka skul kam da thew eh ban lait kali, hynrei na ka bynta ki khynnah skul ba kin ïaid khnang ba kan long ka jingshngain ha ka por slap ne heh um namar ba ki khynnah ki hap ban iaid na ka lynti barit.
“Ka election ka leit bad ka wan, ka jingjop bad ka jingrem ka don beit hynrei u nongïalam um ju shah rem” ong u Bah Lambor.
Shuh shuh u Bah Lambor u la ong, “Ka jinglong nongmih khmat ne ka jingbym long nongmih khmat, lada phi long u nnongmih khmat hynrei ka mynsiem ka khim ka long lehnoh ei hynrei lada phim long nongmih khmat hynrei phi don ka mynsiem ba kylluid ka mut ba u Blei um ju iehnoh hynrei u kyrkhu ïa uta u briew”.
U Bah Lambor u la ong, Mynta ka sngi nga la ioh ban khap ïa u ribon jong kane ka jingkieng ïaid kali bad ka la long ka jingkmen ba khraw namar ba ka jingïadei ka jong nga bad kane ka skul ka dang ïai sah haduh mynta.
Na ka liang jong ki tymmen basan haba kren lyngkot ha kane ka jingialang plie kila pynpaw ka jingsngewnguh ïa ka jingkloi u Bah Lambor kan kner ki kti wat lada um shym la dei shuh u nongmih khmat hynrei u ïai bteng ban leh ki kam, hadien ba ka Balang kala pynsngew sha u.
