Lum jingïalang ki heh ophisar ka district halor ka jinpyntreikam ïaki skhim sorkar ha Ri-Bhoi

Nongpoh, Jymmang 25: Ki heh ophisar naki tnad sorkar bapher bapher ka Ri-Bhoi District mynta ka sngi kila lum jingïalang ha DRDA Conference Hall shibynta jong ka jingïalap Jan Bhagidari- Sabse Door Sabse Pehle bad ka jingsdang ban pyntreikam ïaki jingmyntoi bad ki skhim sorkar bapher bapher ha Ri-Bhoi District.
Ïa katei ka jingïalang la pynïaid da u Raja Brahma Additional Deputy Commissioner & Project Director, SRES-DID, DRDA, Ri Bhoi District haka jingdonlang ki heh ophisar naki tnad sorkar bapher bapher ban bishar ïaki jingpyntreikam ïaki skhim bad kumno la kynjoh sha ka thong bad lyngba ka prokram kumba 279 tylli ki shnong ha Ri-Bhoi District kila shah kynthup ban ioh jingmyntoi da ka jingtreilang jong ki tnad sorkar bapher bapher.
Ha ka jingïalap, la pynlong katto katne ki IEC bad ki kam ba ïadei bad ka imlang sahlang ban pynthikna ïa ka jingïashim bynta jong ki paidbah bad ka jingpynsngewthuh. Ïa ki Transect Walk la pynlong da ki nongtrei jong ka Block ryngkat ka jingïatreilang bad ki nongïalam shnong bad ki dkhot shnong ban bishar bñiah ïa ki jingeh ha ka thaiñ bad ban ïakynduh beit markhmat bad ki paidbah.
Ka tnat ka koit ka khiah ka la pynlong ruh ïa ki Health Camp bad ki jingpynsngewthuh paidbah na kawei ka iing sha kawei pat ban pynleit jingmut ha ki jingshakri ha ka koit ka khiah, ka jingkhuid jingsuba, bad ki skhim jingïarap ba lah ban ioh naka sorkar. La sakhi ïa ka jingshim bynta kaba radbah jong ki paidbah ha baroh kawei ka jingïalap, kaba la ïarap shibun ïa ka jingjop bad jingtreikam jong kane ka prokram.
Lyngba kane ka jingïalang ki ophisar kila ioh ruh ban mir jingmut bad ki jingeh ba ki ïakynduh haka jingïaid lynti jong kane ka prokram bad kumjuh ruh ki paidbah kiba la ïathuh ïaki jingeh jong ki ha kaba ïadei bad ka jingioh bad treikam jong ki skhim sorkar bad katto katne ki jingeh la lah ban pynbeit mardor da ka jingtreilang ki tnad sorkar katba ki dang don shibun ki jingeh kiba dang donkam ban buddien khamtam ba ban pynthikna ba ki kaam pynroi baroh ki dei ban lut sha ki shnong khamtam ki shnong kiba jngai tam jong ka district.