Shillong, Jymmang 24 : U Nongïalam ba hakhlieh duh ka UDP u bah Metbah Lyngdoh u la ong ba ka long kaba donkam ïa ki Seng Riewlum ban ïatylli na ka bynta ban ïada ïa ka bha ka miat jongka jylla bad khamtam eh ban lah ban ïaleh pyrshah bad kine ki Party ba heh na ri thor.
Halor ka jingkylli ïa ka jingpyrshang ka BJP ban rat dyngkong ïa ki Seng Riewlum ne ki Seng trai ri ha baroh kawei ka ri u bah Metbah u la ong kane kam dei kaba dang thymmai hynrei kaba la ju jia hi na ka por sha ka por.
“ Ka jingpyrshang jong ki seng heh ban pynduh pyndam ïa ki seng riewlum ka dei kaba naduh mynshwa, kum ka Congress , ka TMC bad mynta ka BJP. Hooid ki don arngut ki MLA hynrei ki dang ïai bteng ban \ïai neh beit hangne bad ki don ka hok ban pan ïa ka jingkyrshan na ki paidbah jongka jylla ruh” ong u bah Metbah.
Hynrei haba phai sha ki Seng Riewlum, ka thong ba ki buh hakhmat eh ka long kaba ïapher. Na kata ka daw ka long kaba donkam ba kin ïatylli bad ïatrei lang kawei kum ka kynhun. “ Nga la ïai khot ïa kiwei ki Seng Riewlum ban ïatrei lang hapoh kawei ka kynhun kata ka RDA namar kumba long mynta ngi don tang ka UDP bad HSPDP bad kane ka dei kaba ki paidbah ka jylla ki thrang eh” ong biang u bah Metbah.
Haba kdew ba ka jylla Meghalaya ka long kaba rit bad don tang khyndiat ki paid nongshong shnong kumta ka kam ka dawa ba dei ban shim khia bha ïa kane.
“ Lada phi peit ïa ka jingdon ki nongshong shnong jong ngi ka long kaba dei ban shim khia bha bad ban ïalehkai politik halor kane kam long kaba bha” u la ong.
U la pynshai ba u kren ïa kane ym dei ba u kren pyrshah ïa ki National Party. Ki National Party k dei ban peit ïa kaei kaei kaba ïadei bad ka ri hynrei ma ngi kum ki seng riewlum kaba ngi buh ha khmat duh ka dei na ka bynta ki paid nongshong shnong ka jylla bad jong ka thaiñ bad ngi ïai tyllun ruh halor kata ka nongrim” ong biang u bah Metbah.
“Da ka jingïai mih ki seng saiñ pyrthei kiba thymmai ka la dei ka por ban ïa pyrkhat thymmai noh. Ki don bun ki mat kiba ïai mih bad ki seng riewlum ruh ki ïai mih na kawei ka por sha kawei pat, kumta ka dawa ïa ngi ba ngi dei ban ïa tylli ban ïa kaba ngi pynlut por ban phai khmat tang sha ki National Party” Pynkut u bah Metbah.
