Nongpoh, Jymmang 24 : Ka Samla Ai-Insara Makri na ka shnong Mawtnum ka la long ka nongjop jong ka jingïakop pyni sap Ribhoi Superstar Season 3 hadien ba ka la lah ban pynhun ïa ki nongbishar ha ka jingïakhun pyni sap ha ka Grand Finale jong katei ka lympung kaba la pynhap pyrda syndon mynta ka sngi ha Parish Hall, Nongpoh.
Kum ka nongjop, ka samla Ai-Insara ka la ïohrah ïa ka song pisa kaba T.25,000 ryngkat bad ka trophy lem bad ka syrnot. Ka jingïashim bynta jong ka ha ryngkat bad u ryndang uba siang ban rwai ïa ka jingïarwai kaba sngewtynnad ka la pynhun ïa ki nongbishar ban pynkup burom ïa ka kum ka lahduh ha katei ka jingïakop jong kane ka samoi.
Ka Ri-Bhoi Superstar ka dei ka rynsan ba la pynlong kyrpang ban ai lad ïa ki khun samla ka Ri-Bhoi ba kin pynpaw ïa ki sap rwai, shad bad kiwei pat. Ïa kane ka jingïakop la pynlong da ka LS Syiemlieh Production kaba dei ka kynhun ba la ïalam da u Bah Lansius Syiemlieh uba long ruh u CEO jong ka.
Da ka jingangnud ban kyntiew ïa ki samla donsap jong ka dong bad ka thaiñ Ri-Bhoi, kane ka kynhun ka la lah ban pynlong haduh lai sien ïa kane ka jingïakop, bad ka kynti ba mynta ka dei ka samoi kaba lai ka la poi noh sha kaba kut da ka jingsam khusnam ïa ki nongjop ha ka Grand Finale.
Ha kane ka jingïakhun kaba khatduh, la don haduh 13 ngut ki nongïashim bynta, kiba kynthup ïa ki kynhun bad ruh ki nongshim bynta shimet. Kitei ki nongïashim bynta ki la pynpaw ïa bun jait ki sap kiba pher naduh ka rwai ka siaw, shad, beatbox kaba pynmih sur jingïatem da ka shyntur.
Ha katei ka sngi bala pynkut bad pynhap pyrda syndon ïa kane ka lympung la wan ban sakhi lang ruh da u Deputy Commissioner ka Ri-Bhoi, u Abhilash Baranwal, u Jayanta Mudoi, Branch Manager ka HDFC Bank Nongpoh, u Bah Lansius Syiemlieh, CEO ka LS Syiemlieh Production, lem bad bun ki paidbah kiba la wan ban ai jingkyrshan ïaki nongshim bynta bad sakhi ha kane ka lympung.
