Ka jingsdang kaba kongsan jong ka Viksit Bharat -G RAM G Act ha kylleng ki jaka nongkyndong

New Delhi, Jymmang 24: Da kaba rakhe ïa u mawmer ba kongsan ha ka jingïaid lynti jong ka roi ka par ha ki jaka nongkyndong jong ka India, ka Sorkar India ha ka 11 tarik u Jymmang 2026 ka la pyntip ïa ka jingpyntreikam ïa ka Viksit Bharat – Guarantee for Rozgar and Ajeevika Mission (Gramin) [VB-G RAM G] Act, 2025, ban pyntreikam ha ka ri baroh kawei naduh ka 1 tarik Naitung 2026.
Da ka jingtreikam jong ka VB-G RAM G Act, ka Mahatma Gandhi National Rural Employment Guarantee Act (MGNREGA), 2005 kan duh noh naduh katei hi ka tarik. Kane ka pyni ïa ka jingkylla kaba kongsan ha ka rukom kyntiew ïa ki jaka nongkyndong jong ka India bad ka wanrah ïa ka juk ba thymmai jong ka jingkylla kaba ïasohlang, kaba la pynkhreh na ka bynta ka lawei bad ka jingkylla ha ki jaka nongkyndong katkum ka jingseisoh, kaba ïahap bad ka jingthmu jong ka ri na ka bynta ka Viksit Bharat @2047.
Hapoh ka rukom treikam kaba thymmai, man la ka longïing ha ki jaka nongkyndong kaba ki dkhot kiba la san ki treimon sngewbha ia ki kam bylla kin ïoh ïa ka jingkular katkum ka aiñ kaba long 125 sngi ka jingtrei ba ïoh jingsiew ha man la ka snem mang tyngka. Ka jingpynthikna ba la pynïar ka long ban pynkhlaiñ ïa ka jingshngaiñ ha ka kamai kajih, ban kyntiew ïa ka ïoh ka kot ha ki jaka nongkyndong bad ban kyrshan ïa ka roi ka par kaba ïaineh ha ki shnong.
Yn ai kam ïa ki nongtrei pyrshah ïa ka jingdawa jong ki ban trei hapoh ka por ba la buh, lada ym lah ki nongtrei kin dang don hok ban ïoh ïa ka bai bylla khlem kam katkum ki kyndon jong ka aiñ.
Ka Aiñ ka ban jur ïa ka jingsiew bai bylla ha ka por kaba biang bad kaba shai. ïa ki jingsiew dei ban phah beitbeit sha ki bank lane post office account jong ki nongtrei lyngba ka Direct Benefit Transfer (DBT). Ïa ki bai bylla dei ban siew man ka taïew lane hapoh khatsan sngi naduh ba khang ïa ka muster roll, lada ym lah ki nongtrei kin ïoh ïa ka jingiew bai lutksan katkum ki kyndon jong ka aiñ.
Ka Sorkar India ka la pynthikna ïa ki jingpynbiang ïa ki bynta ba bniah kiba ïadei bad ka pisa na ka bynta ka jingpyntreikam hok ïa ka Viksit Bharat – G RAM G Act, 2025. Na ka bynta u snem mang tyngka 2026-27, ka sorkar pdeng ka la mang pisa haduh T.95,692.31 klur, ka jingmang kaba heh tam ha ka kyrdan Mang Tyngka na ka bynta ka prokram ai kam ai jam ha ki jaka nongkyndong.
Lada kynthup ïa ka jingnoh synñiang jong ki Jylla, ka jinglut baroh jong ka prokram la antad ba kan palat ïa ka T.1.51 lak klur. La khmih lynti ba kane ka jingmang pisa kan ai bor thymmai ïa ka jingkyntiew ïa ki jingdon jingem ha ki jaka nongkyndong, ka jingpynmih kham bun ki lad ïoh kam bad ka jingkyntiew ïa ka ïoh ka kot ha ki jaka nongkyndong.
Khnang ban pynthikna ïa ka jingkylla kaba ïaid beit ïaid ryntih bad kaba phaikhmat sha ki nongtrei, ka ïoh kam ïoh jam hapoh ka MGNREGA kan bteng khlem jingthut haduh ka tarik ban sdang ïa ka aiñ kaba thymmai. Ïa ki kam kiba dang ïaid hapoh ka MGNREGA haduh ka 30 tarik Jylliew yn buh bad rah ha ka rukom treikam kaba thymmai khlem jingeh da kaba pynthikna ïa ka jingïahap bad ki kyndon jong ka Viksit Bharat G RAM G. Ka jingdon ka kam ha ka por bad ka jingsiew kloi ïa ki bainong sha ki nongtrei ha ki jaka nongkyndong ka long ka jingthmu ba kongsan jong ka Sorkar.
Ka Sorkar ka la pynbiang ïa ka mang tyngka na ka bynta ki nongtrei bylla sha ki Jylla bad ki Union Territory katkum ki rukom dawa bad ki jingdonkam ha ki jaka khnang ba ym don kawei ruh ka longïing ha ki jaka nongkyndong kaba dei hok ban ïoh kan ïakynduh jingeh ha ka por shwa ban sdang ïa ka VB-G RAM G Act.
Ki Job Card MGNREGA ba la pynshisha da ka e-KYC ba la don lypa kin dang treikam hapoh ka VB-G RAM G tad haduh ban da pynmih ïa ki Gramin Rozgar Guarantee Card. Ki nongtrei ki bym don ïa ki Job Card ki lah ban pynrung kyrteng ha ka Gram Panchayat. Ki nongtrei kin nym shah khang lad ban ïoh kam tang namar ka e-KYC kaba dang sahteng, bad ki jingpynbeit ban pynsuk ban pyndep ïa ka e-KYC kin bteng ha ki shnong da ki Sorkar Jylla.
ïa ki kyndon bapher bapher kiba la shna hapoh ka VB-G RAM G Act, 2025 la pynkhreh da ka Tnad Rural Development ha ka jingïamir jingmut bad ki jylla bad ki Union Territory.
Ki kyndon halor ki kyndon ba kongsan na ka bynta ka jingai bynta ba thikna. Ki kyndon jong ki jingpynbeit ba kylla. Ki kyndon jong ka National Level Steering Committee. Ki kyndon jong ka Central Gramin Rozgar Guarantee Council. Ki kyndon kiba ïadei bad ka jingpynlut ha ka kam synshar. Ki kyndon ban pynbeit ïa ki jingeh. Ki kyndon halor ka rukom siew ïa ki bainong bad ka Unemployment Allowance. Ki kyndon halor ka rukom ban bah ïa ka jingpynlut kaba donkam shuh shuh.
Ki kyndon ha kaba ïadei bad ka rukom ban kit ïa ki jinglut jingsep jong ka Skhim na ka bynta ki Union Territory khlem ka ïing dorbar thawaiñ.
Ban pynthikna ïa ka jingkylla kaba ïaid beit ïaid ryntih na ka Mahatma Gandhi NREGA sha ka VB-G RAM G, la pynrung ïa ki kyndon kiba ïadei ha ka Transitional Provisions Rules, ïa kaba la khmih lynti ba yn sa pynmih shen. Kiwei pat ki kyndon bapher bapher, kumba la kdew haneng, la shna ruh bad yn sa pynmih shen ban ïoh jingmut na ki paidbah.
La khmih lynti ba ka Viksit Bharat – G RAM G Act, 2025 kan ai bor thymmai ïa ka jingpynmih ïa ki lad ïoh kam ïoh jam, ka roi ka par ha ki jaka nongkyndong bad ka jinglah kyrshan dalade ha ki shnong ki thaw. Da kaba buh ïa ki Gram Panchayat kum u rishot ba kongsan jong ka jingkylla ha ki jaka nongkyndong, ka Aiñ ka la pynkhreh ban long u mawmer ba kongsan ha kaba tei ïa ki jaka nongkyndong jong ka Bharat kiba la pynkupbor, kiba seisoh bad kiba la kiew shaphrang.