Shillong, Jymmang 22 : Ka kynhun ialehkai jong ka Madan Thymmai ka la rah ia ka nam lahduh ha ka lympung ialehkai phutbol ba la tip kum Bakstar Mawlong Memorial football tournament kaba la pynhap pyrda noh ha kane ka sngi Thohdieng.
Napdeng ki hynriew tylli ki kynhun kiba wan ban ia shim bynta, ki artylli kiba poi sha ka final ki kynthup ia ka Dong Mawpyllun SC pyrshah ia Madan Thymmai SC ha kaba ka Madan thymmai ka la ioh rah ia ka nam laduh ryngkat ka song pisa.
Ka jingpynlong ia kane ka lympung ialehkai ka long ban kynmaw burom ia ka lynkhuh sngi iap jong i Bah (L) Bakter Mawlong,i ba long ruh i kpa jong u nongialam barim ka seng FKJGP Bah Wellbirth Rani. Ia kane ka lympung ialehkai la pynlong ha ryngkat ka jingiatreilang bad ka Dorbar shnong Malieh Poh ha ka shnong Tyrsad.
Ki kynhun ialehkai kiba lawan iashim bynta ki don haduh 6 tylli kiba na ka shnong Malieh Poh, bad kine ki kynhun ki kynthup ia ka Madan thymmai SC, Dong mawpyllun SC, Lungdiengkynthong SC, Dongpdeng SC, Dong Mawria SC, bad ka Laitsemkhla SC.
Ua kane ka lympung ialehkai la pynhap pyrda noh da u Nongialam barim ka seng FKJGP u Bah Emlang Lytan u ba la long kum u kongsan ha ryngkat ka jingiadon lang u Bah Kit Nongphlang u ba long ruh u vice president ka FKJGP Sengkmie, u Bah Auspicious Lyngdoh ki ba haiing ha sem jong i(L) Bakstar Mawlong, ki riew rangbah kumjuh ruh ki nongkit kam ka sport club jong ka shong Malieh Poh.
