Lyngngoh ka VPP ba ïoh jaka ki bar jylla ha Polo, ka dei ruh kaba la buh ophis NPP, kynnoh u Bah Marbud

Shillong, Jymmang 21: Ki dkhot ka VPP Youth Wing hapoh ka jingïalam jong u President jong ka u Bah Marbud Dkhar u la ong ba ki dkhot jong ka ki la shah kynting sha ka mon bad sha ka diang haba ki la leit ban ïa kynduh ïa ki kam kiba kongsan jong ki paidbah.
Haba kren sha ki lad pathai khubor u la ong ba na ka liang ka seng ka la dep ban ïa kynduh ïa ka Additional Secretary jong ka Revenue hapoh ka ophis DC kaba ïadei bad ka kam kiba la VPP youth wing ka la shim ha ki snem ba la dep.
Halor kane, “Ngi la dep ban wan kynduh ïa ki bor ba dei peit ban tip ba mano kiba longtrai ha ka jaka kaba don marjan bad jong ka ïing u Myntri Rangbah kaba don ha Polo, ki la kynting ïa ngi sharum shaneng bad ngim la ïoh ïa ka jubab kaba biang naduh ki snem kiba la dep bad ngim shym la ïoh ia ki jubab kiba biang bad dei halor kane na ka liang jong ka State Youth Wing hap ban file noh da ka RTI bad ha ka jubab la ïoh jingtip ba katei ka jaka kaba la buh ïa ka ophis NPP ka dei ka jaka jong ki riew shimet kiba dei ruh ki bar jylla, kane ka la buh ka jingkylli ba kumno ki bar jylla ki ïoh ban thied jaka hangne hapoh jaka kaba don ha Shillong, ha Polo bad la ïoh ka jubab ba katei ka jaka ka dang hab hapoh ka European Ward (EW) bad la ïathuh ba kiba bun ki jaka hapoh ka nongbah Shillong kidei kiba hap hapoh ka EW,” ong u Bah Marbud Dkhar.
Ha kaba ïadei bad kane na ka liang utei u nongïalam u la ong ba ka seng kan dang ïai buddien halor kine ki kam tat haduh ban lah ban pynmih paidbah ïa ki jingeh kiba ki paidbah ki ïa kynduh na ka por sha ka por bad kumjuh ruh u la kyrpad ïa ka jingïatreilang jong ki paidbah ha kaba ïadei bad kane ka jingeh kaba ki samla bad ki nongshong shnong jong ngi ka jylla ki mad na ka por sha ka por.
U la ong ruh ba kumba ka long ha kane ka por na ka liang ka seng ka dang ap ïa kiwei pat ki jubab kiba dang pan lyngba ka RTI bad yn sa khmih kaei kaba mih na kine.