Trei tyngeh ka jingïap tram ki dieng kwai ha kylleng ka jylla, da ka HLC thaw ka sorkar jylla

Shillong, Jymmang 21 : Ka Sorkar Jylla ka la thaw da ka High Level Committee na ka bynta ban bishar bniah halor ka jingïap tram ki dieng kwai jan ha baroh ki bynta jong ka jylla haduh ba ka la ktah ïa ka ïoh ka kot bad ka kamai kajih jong ki paidbah, ong u Myntri ka tnad ka Rep ka Riang, u Timothy D Shira.
Haba kren bad ki lad pathai khubor, u Myntri u la ïathuh ba kane ka jingïap tram ki dieng kwai ka la ktah bun bha ki distrik jong ka jylla. “Kumta halor kane, ka sorkar jylla ka la thaw da ka High Level Committee ha kaba ha ki district la khlieh da ki Deputy Commissioner kum ki Chairman ban peit bniah ïa ka shah ktah kaba mih na ka jingïap tram kine ki mar rep bad ki jaka kiba kham shah ktah jur. Ha kajuh ka por kin wad ki lad ki lynti kumno ban ïakhun pyrshah ïa kane ka jingïap tram,” u la ong.
Katkum ka jingïathuh jong u Myntri, ki district kiba shah ktah ha kane ka jingïap tram ki kynthup naduh ka North Garo Hills, South Garo Hills, West Garo Hills, South West Garo Hills — bad jan baroh hi ka rilum Garo. U ong ruh ba kane ka ktah ruh ïa ki bynta jong ka Ri Bhoi, ka Rilum Khasi – Jaintia kiba shah ktah ki dei ki bynta ba shathie khappud bad ka Bangladesh bad kumjuh ruh ki bynta jong ka South West Khasi Hills ruh.
Ha kajuh ka por u la pyntip ruh ba ka sorkar ka la don da ka minimum support price na ka bynta ki nongrep synsar kaban tynrong ïa ki lada jia ba ka dor ka hiar. Katkum ka jingïathuh jong u pat haduh mynta ym pat ju don ba ujor haba ïadei bad kane ka bynta.
U Myntri u la ïathuh ba kane ka sienjam ba ka sorkar ka shim ka long ban kyrshan ïa ki nongrep ban ïoh ïa ka dor kaba biang lada jia ba ka dor u synsar ka hiar ha iew.
Kumta halor kane ka bynta kaba ïadei bad u synsar, u Myntri u la ïathuh ba kin sa shong bishar biang lada ka don ka jingujor na ki paidbah nongrep. “Tangba naduh ba don kane ka minimum support price ne ka dor ba ka sorkar ka buh ban thied ïa u synsar lada ka dor ha iew ka hiar, ym pat ju don na ki paid nongrep kiban wan ujor,” u la ïathuh.
U la ong ruh ba lada jia ba ki nongrep ki ujor sha u Myntri Rangbah khlem pep un sa pyntip ïa u lane bthah ba un tuklar halor katei ka mat hynrei haduh mynta kam pat don kaba kum kata.