Shillong, Jymmang 21: Ka State Co-ordination Committee of Coal Owners Miners & Dealers, Exporters Forum (SCCOMDEF) kaba dei ka kynhun nongkhaïi bad nongtrei marpoh khyndew, u dewiong kaba la seng naduh u snem 2006 kala ïa kynduh dangshen ha ka jingialang kaba la long ha Shillong ha ka 19 tarik u Jymmang, ban ïatir ïatai bad pyrkhat lang halor ki kam kiba la ktah shi katdei eh naduh ba shah khang ka tih dewiong ha u snem 2014 bad kaba la ai lad pat da ka rukom tih thymmai katkum ka juk stad ha u snem 2019 bad lyngba ka jingialang kaba la ioh ïa ka jingiadonlang ki trai par bad nongkhaii dewiong kiba la mih khmat ïa ka Jaintia, Khasi bad Garo Hills.
Katkum ka kyrwoh khubor na u Bah Mostophar Kharkongor uba dei u Secretary jong ka SCCOMDEF u la pyntip ba la shim ïa ne ki rai ba kynthup, U dewiong kumba ngi ïatip lut ïa ka jingkordor bad jingmyntoi jong u bad kaba la bsa ja ïa ki hajar ngut ki paid bynriew jong ka jylla ha kiba bun ki liang bad rukom bad ka jingshah khang ban tih da ka rukom mynbarim ne tih thliew khnai ia ki par dewiong kala ktah jubor ia ki bun baling.
Shuh shuh u la ong ba ka Forum kaba long ka Seng khliehduh ha ka Jylla ïa ki trai par bad nongkhaïi dewiong bad ka bym ju put turoi ne heh tyngam ha ki lad pathai khubor hynrei kaba trei jar jar bad ïai buddien ïa ki kam ban ioh plie biang ïa ka jingtih bad ban khaïi ïa u dewiong.
U Secretary ka Forum u la pynpaw, ba kila ioh lad ban pynkhreh ïa ka rukom tih thymmai ïa u dewiong kaba la ai kyrteng kum ka ‘Small scientific underground coal mining’ ha ka jaka jong ka rukom tih mynbarim ne kata ka ‘Open cast coal mining’ namar ba ka jingdon bad ka jinglum jong ki jaka ba don u dewiong u ba don ha ka Jylla u kham pher na kiwei pat ki Jylla jong ka Ri India.
“Ka jingpynkhreh ïa ka Draft Mining Proposal kaba thymmai la sam bad ai sha baroh ki Seng kiba khmih bad peit ïa ka kam dewiong ba kin bishar bad peit bniah halor jong ka bad katkum ka jinglong jingman jong u dewiong ha ki thain ne jaka jong ki bad ba kin pyndep noh kloi ïa kane ka jingbthah khnang ban ioh pynkhreh ïa ka Final Proposal ban ioh ai sha ki bor Sorkar lyngba u Myntri Rangbah Duh jong ka ri ban khmih ban peit bad ban sngap ïa ki jingai jingmut khnang ban ioh plie biang ïa ka kam tih bad khaïi” ong u Bah Kharkongor.
Kane ka jingai jingmut kaba thymmai kan kynthup ïa ka jingpynneh bad jingsumar ïa ka mariang, ka jingsumar ïa ka um kaba mih na ki thliew par dewiong, ka jingiada ïa ki nongtrei par dewiong nalor kiwei ki lad ki ban pynmyntoi ruh ïa ki trai par bad nongkhaii dewiong bad ha kajuh ka por ban pynheh ruh ïa u saipan Sorkar na ki khajna ban ioh lum na u dewiong u la ong.
