Sa 40,000 hectare ïakhun ka tnad rep ban kot 1lak hectare ki jaka rep khlem dawai

Shillong, Jymmang 21 : Ka tnad ka Rep ka Riang jong ka Sorkar Jylla mynta ka donkam sa kumba 40,000 hectare ka jaka na ka bynta ban pynïar ïa ka rep khlem dawai ha ka jylla khnang ban kynjoh sha ka thong ba 1 lak hectare ka jaka rep khlem dawai ne organic farming.
Katkum ka jingïathuh da u Myntri ka tnad, Timothy D Shira, ka Sorkar Jylla mynta ka don da ka policy bad da ka jingïarap jong ka sorkar pdeng haduh shi lak hectare la buh thong ban don ki jaka rep khlem dawai. “Ngi la don mynta 60,000 hectare ki jaka rep organic farming bad kaba donkam ka long sa 40,000 hectare ka jaka rep khlem dawai,” u la ong.
Ha kajuh ka por u Myntri u la ïathuh ba ki paid nongrep mynta ki la sdang ban kiar ban pyndonkam ïa ki dawai rep bad ki la jied bujli da ki kynja sboh lane ki dawai sboh bym dei dawai.
Da kaba ai nuksa ïa u Shynrai Lakadong uba rah ïa ka nam jong ka Meghalaya, u Myntri u la ong ba kane ka dei ka nongmuna jong ka jingpyrshang. “Dang shen nga la leit jngoh ïa kane ka jaka (Lakadong turmeric cluster), kaba la pynïaid da ka cooperative society bad nga lap ba ki la lah ban leh bha,” u la ong.
Shuh shuh u ong ba da kane ka rukom ïatreilang ka la kyntiew ïa ka ïoh ka kot jong ki nongrep bad ka jinglah ban ïoh ïa ki iew ki hat. “Mynshwa ki nongrep ki hap ban rah ïa ki mar rep sha iew hynrei mynta kim donkam shuh ban leit sha iew,” la batai u Myntri. U la ïathuh ba ki paidbah mynta ki wan wad hi sha ka society bad ki siew dor kaba kham heh ban thied ïa une u mar rep uba la poi shalan mynta wat sha barri.