Mairang, Jymmang 21: Ka jingpyntrei ïa ka Eklavya Model Residential School harud ka shnong Umjei Eastern West Khasi hills district kaba la bei pisa da ka sorkar pdeng lyngba ka National Education Society for Tribal Students ka la ïaid shait shait mynta.
U nongthohkhubor jong u Mawphor ha kane ka sngi palei ka 21 tarik Jymmang u la leit sha katei ka jaka ban ïakynduh ïa ki nongpynïaid ïa katei ka jingtrei bad la ïoh ban ïakren bniah bad u site Engineer uba don ha katei ka jaka ban peit ïa ka jingtrei.
Haba kylli na u ba naduh mynno la sdang ban pyntrei ïa katei ka skul u la ïathuh ba ïa ka work order la dep ïoh naduh u snem 2023 hynrei na ka jingbym pat lah ban pynbit pynbiang ïa ki jingdonkam bad ki trai jaka ka jingpyntrei ka la sahkut hynrei hadien ba ka National Education Society for Tribal Student rynkat bad ka sorkar jylla ki la dep ban pynbit pynbiang ïa ki jingdon kam ba la ïoh ban sdang ïa ka jingtrei tang naduh u bnai Kyllalyngkot jong une u snem 2026.
Utei u Engineer u la ïathuh ruh ba ka jingtrei ka kham kham suki khyndiat namar ka jingduna nongtrei namar lada wan rah da ki nongtrei ki bym dei na kane ka jylla Meghalaya ruh ki don shibun ki jingpynwit hagngne hangtai hynrei na ka liang ki nongpynïaid ïa katei ka jingtrei ki la ïaleh katba lah ban pynrung nogntrei da ki trai jylla.
Ha kaba ïadei bad ka jingdon ki nogntrei haduh mynta utei u Engineer u la ïathuh ba tang ki misteri ki don kumba khatsan ngut nalor kiwei kiwei ki nongtrei
Haba kylli pat kumba katno bnai kan shim por ban pyndep ban shna ïa katei ka skul u la ong ba ban pyndep tang ïa ka ïng skul kan shim por kumba shisnem tam hynrei haduh ban da pyndep lut ïa baroh kan shim por la kumno kumno haduh arsnem ne tam.U la ong ruh ba ka daw ka dei namar ki aïom slap kham bun ki sngi ba hap ban sangeh trei.
Ha kajuh ka por u la ong ba wat la katta ruh na ka liang jong ki nongpynïaid kin ïaleh katba lah ban pynsted ïa ka kam bad u la ong ruh ba na ka liang jong ki ki kwah ba ki paitbah kin ai ka jingïatrei lang kaba pura khnag ba kan ym don kano kano ka jingshah pynwit haduh ba ka jingtrei kan da dep lut baroh.
