MSL 5: Pynkyndit ka Nangkiew Irat ïa ka Langsning; Thep hat trik u Iaishah ha ka jingjop jong ka Shkenshynriah ïa ka Maram

Shillong, Jymmang 21: Ka Nangkiew Irat SC ka la pynkhie im biang ïa ka jingkyrmen ha ka lympung 5th Meghalaya State League da kaba pynliem da 3-1 kol ïa ka Langsning FC hynne ka sngi Palei ha madan First Ground-SSA Stadium.
U Wallamsuk Nongkhlaw (25’P) u la pynkhihjar nyngkong na ka penalty ban buh hakhmat ïa ka Nangkiew Irat hynrei u Kyrmenskhem Mukhim (42′) uba la mih bujli u la pynïakhaid shipor na ka bynta ka Langsning tang shuwa ban jam sha ka por shongthait. U Wallamsuk u la pynlamkhmat biang ïa ka Nangkiew ha ka minit kaba 50 shuwa ba u Justerwell Tham (81′) un bynrap ïa kaba lai ban pynthikna ïa ka jingjop khlem jingartatien.
Da kane ka namrem ka jingjop kaba 10 sien lynter jong ka Langsning ha ka MSL mynta ka samoi ka la poi sha kaba kut. Ka Langsning ka pynliem ïa ka Nangkiew Irat da 6-1 kol ha ka jingïakhun tang lai sngi mynshwa, hynrei kam shym la lah satia ba kan wanrah biang ïa ka jingïalehkai ba kyrpang hynne ka sngi.
U nongapkol ka Nangkiew Irat u Emerald Dan u la shah tynjuh da katto katne ki kabu kiba paka ha kaba sdang jong ka jingïalehkai pynban ka kol kaba nyngkong ka la jia sha kawei pat ka liang jong ka madan hadien ba u Wallamsuk u la shah pynur hapoh phyllaw kol shuwa ba un thep na ka penalty.
Ka Langsning kaba la pynshong jahthait ïa ki katto katne ngut ki rangïalehkai ba shakhmat hynrei hadien ba shah lamkhmat u coach u Khlain Pyrkhat Syiemlieh u la hap ban sei madan ïa u Kyrmen, ha ryngkat u Dajiedlang Wanshnong, uba la shut ïa ka corner kaba u Kyrmen u la thep da ka khlieh.
Watla ki la don shuh shuh ki nongbujli na ka bynta ka Langsning, hynrei kam shym la lah ban tehlakam ïa ka kylla miet, ha kaba ka Nangkiew Irat ka la pynkhih sa ar tylli ki kol na u Wallamsuk bad u Justerwell.
Ha ka jingïalehkai kaba nyngkong, ka Rymbai Shkenshynriah SC ka la khur ïa ka jingjop da 6-2 kol pyrshah ïa ka Maram FC kaba la shah pynduna sha ka 10 ngut hadien ba ïoh red card u Tremarchwal Ch Marak.
U Iaishah Bareh (3′, 52′, 75′) u la thep ïa ka hat-trick (kaba dei tang ka hat trick kaba ar ha ka Quarterfinal stage), u Hesmiki Rymbai (19′, 90’+5) u la thep ar kol katba u Niponghi Sumer (20′) u la noh synñiang shi kol.
Watla shah rem ka Maram kam shym la pynkut thylli ïa kane ka jingïalehkai da kaba pynkhihjar lyngba u Seiborlang Tado (53′) bad u Santosh Teron (77′). Kane ka dei ka jingjop kaba ar sien lynter jong ka Shkenshynriah pyrshah ïa ka Maram, hadien ba jop ïa ka 1st leg da 4-2.
Ha ka miej kheiñ point jong ka Group, ka Langsning ka dang bteng ban lamkhmat da 9 point, kaba ïaryngkat bad ka Shkenshynriah hynrei ka bat ïa ka kyrdan ba nyngkong namar ka don ïa ka rekod jingjop kaba kham bha (head to head). Ka Nangkiew Irat ka bud nadien ha ka kyrdan ba lai da 6 point katba ka Maram sha trai duh (0 point).
Ki jingïalehkai jong ka Group A kin wanphai biang mynta ka sngi ha kaba ka Nongkseh SSCC kan aireng pyrshah ïa ka Rangdajied United FC ha ka por 2 baje mynsngi; ka Nongkseh ka la jop da2-1 ïa ka RUFC ha ka 1st leg. Nangta ha ka por 6 baje janmiet ka Shillong Lajong FC pyrshah ïa ka Mawlai SC, ha kaba kine ki ar liang mamla kin ïaknieh ban ïoh ïa ka kyrdan ba ar; Ka Lajong ka la jop da 3-1 ha ka 1st leg.