Kam pat poi haduh u pud ban tieng ïoh kyrduh petrol bad diesel ha ka jylla : Methodius Dkhar

Shillong, Jymmang 20 : Ka jylla haduh mynta kam pat don satia ha ka jingsyier ïoh wan ka jingkyrduh petrol bad diesel, ong u Myntri ka tnad Food Civil Supplies and Consumer Affairs ka sorkar jylla, Bah Methodius Dkhar ha kane ka sngi Balang.
Tangba, ha ka jingïakren bad ki lad pathai khubor, u Myntri u la kyntu pat ïa ki paidbah ba ki dei ban long kiba kunai ha ka rukom pyndonkam namar kin ym lah ban tip ïa ka jinglong jingman ha ka pyrthei na ka jingdon ka thma.
Katkum ka jingong jong u, na ka liang ki ophisar ka tnad ki la dep pynshai ba kam don satia ka jingkyrduh petrol bad diesel ha ka jylla ïa mynta hi.
Ha kajuh ka por u la ong, “Nga kwah pat ban kyntu ïa ki paidbah ka jylla ba kim dei satia ban khuslai. Tangba donkam pat ban long kiba kunai bad peitngor namar kane ka jinglong jingman ha ka pyrthei.”
Da kaba pyntip ba u Myntri Rangbah ka Jylla u ïaid buddien na ka por sha ka por bad ka Sorkar Pdeng, u Myntri u la pyntip ba wat na ka liang jong u bad kumjuh na ka Department kim thiah thai haba ïadei bad kane ka bynta.
Haba kren pat halor ka jingkiew dor ka petrol bad diesel, u Myntri u la ong, “Ka jingkiewdor ka petrol bad diesel kam dei satia kaba leh da ka sorkar hynrei ka dei ka kam kaba leh da ka sorkar pdeng kaba ktah ym tang ïa ka jylla hynrei ïa ka ri baroh kawei.”
Halor ka jingkylli la kan dang don ka jingkiew dor ha ki por ban dang wan, u Myntri u la ong ba namar ka jingdon ka thma ki dang shem jingeh ban ong halor kan ka bynta. Katkum ka jingong jong u lada ka thma ka dang ïai bteng lehse ka jingkiew dor ka lah ban nang kiew biang. “Tangba ngi kyrmen skhem ba ka thma kan kut noh kata lada ka USA bad Iran ki poi ha ka jingsngewthuh jingmut,” u la ong.