Shillong, Jymmang 20 : U Myntri ka Tnad PHE u Marcuise N Marak ha ka sngi Balang ula ong ba ka jingpynslem jong ki Autonomous District Council (ADC) ban aiti ïa ki Utilization Certificate (UC) jong ka pisa hapoh ka 15th Finance Commission ka dei ka daw ba sahkut ka jingsiew ïa ki bill ka Jal Jeevan Mission (JJM) ha Meghalaya.
Haba kdew ïa ka jingïalang ban buddien ïa ki kam ba dang shen bad u Myntri Rangbah Conrad K Sangma ha Taraghar State Guest House, u Marak ula pynshai ba ka jingslem kam dei na ka Sorkar Jylla lane ka tnad PHE.
“Mynta, ngim shym la lah ban siew ïa ki bill JJM haduh mynta bad kane kam dei namar ka Sorkar Meghalaya lane namar ka tnad PHE, ka dei na ka Sorkar India” ong u Marak.
Ki don bun ki kyndon ba ka Sorkar India ka la buh. Kumta, ka tnad PHE ka Sorkar Meghalaya mynta kala leh lut bad pyndep ïa baroh ki kyndon”.
U Myntri u ïathuh ba ka Jylla ka la jan lah ban pyndep pynbiang lut ïa baroh ki jingdonkam ba la buh da ka Jal Shakti Ministry.
Ula kdew ba ka jingslem ban aiti ki ADC ïa ki UC ka dei kawei na ki kyndon kaba la buh jingeh. ‘Ka daw ka long ba hapoh ka Tied Fund jong ka 15th Finance Commission, ka Sorkar India ka la ai pisa ïa ki lai tylli ki District Council. Nga tharai kumba 45 klur tyngka la ai ha u snem 2021-22”.
“Mynta, ka Sorkar India ka la pan ïa ka UC na ki District Council hynrei kim pat pyndep ïa ki UC haba ïadei bad ka jingpyndonkam ïa kane ka pisa” ula ong.
U Marak ula ïathuh ba u Myntri Rangbah ula tuklar ban pynbeit ïa kane ka jingeh. “Kumta, ngi dang ap bad ngi la pyntip ruh sha u Myntri Rangbah halor kane ka bynta bad ula bthah ïa u Chief Secretary bad Additional Chief Secretary ba kin lum ïa ka jingïalang bad ki District Council khnang ba kin lah aiti noh ïa ki UC bad hadien ngin sa lah ban ïakren ia ki jingsiew ïa ki bill jong ka JJM na ka Sorkar India”.
